अबैध आप्रबासी बोकेर युरोप आउँदै गरेको डुंगा भूमध्यसागरमा दुर्घटना, ४३ को मृत्यु, १० को जिवितै उद्दार

Best Khabar Team | २०२६ पुष १७ गते बिहिबार

२१ जनवरी, २०२०
लिंकरोभर, बेल्जियम । अबैधरुपमा युरोप छिर्न खोजेका आप्रबासीहरु सवार डुंगा दुर्घटनामा पर्दा कम्तीमा ४३ जना आप्रबासीहरुको निधन भएको छ । लिबियाको एक प्रमुख शहर ट्रिपोली नजिकै पर्ने भूमध्यसागरमा भएको सो डुंगा दुर्घटनामा ४३ जनाको घटनास्थलमै मृत्यु भएको संयुक्त राष्ट्र संघको प्रवाश एजेन्सी (आईओएम)ले उल्लेख गरेको छ । दुर्घटनामा ज्यान गुमाउनेहरु कहाँका नागरिक हुन् भन्ने विषयमा केही खुल्न सकेको छैन ।

लिबियालगायतका अफ्रिकी मुलुकमा विभिन्न सशस्त्र समूह र सरकारबीच जारी वर्षौदेखिको द्वन्द्वको चपेटामा परेकाहरु समुद्रको बाटो हुँदै युरोप छिर्ने योजना बनाउँदै जोखिमपूर्ण रुपमा समुद्रको यात्रा रोज्ने गर्दछन् । सोही क्रममा पछिल्लो पटक करिब ५ दर्जन आप्रबासीलाई लिएर युरोपको यात्रा तय गर्दै गरेको सो डुंगा दुर्घटनामा परेको हो ।

समुद्रको बीच भागमा आइपुगेपछि डुंगाको इन्जिनले एक्कासी काम गर्न छाडेपछि सो डुंगा दुर्घटनामा परेको अधिकारीहरुले जनाएका छन् । समाचार संस्था सिएनएनका अनुसार सो घटनामा परेका १० जनालाई जिवितै उद्दार गरिएको छ । हरेक वर्ष अबैध बाटो र प्रक्रियाबाट जोखिमपूर्णरुपमा युरोप छिर्न खोज्ने सयौं आप्रबासीहरुले यसैगरी ज्यान गुमाइरहेका छन् ।