पाकिस्तानकी महिला अधिकारकर्मी टोरोन्टोमा मृत भेटिइन्

Best Khabar Team | २०७७ पुष ७ गते मंगलबार

२२ डिसेम्बर, २०२०
टोरोन्टो, क्यानडा । क्यानडाको टोरन्टोमा बस्दै आएकी पाकिस्तानकी मानव अधिकारकर्मी एवं अभियान्ता करिमा मेहराब बलोच मृत फेला परेकी छिन् । क्यानेडाको टोरन्टोस्थित एक अपार्टमेन्टमा शरणार्थीको रुपमा क्यानडा सरकारले उनलाई संरक्षण दिँदै आएको थियो ।

हिजोमात्रै उनको शव घर नजिकैको पानीको तलाउमा भेटिएको यहाँका सञ्चारमाध्यमहरुले जनाएका छन् । उनको हत्या भएको हो वा आत्महत्या भन्ने विषयमा सुरक्षा अधिकारीहरुले अनुसन्धान अघि बढाएका छन् ।

३७ वर्षीया बलोच करिमा केही समयदेखि घरबाटै वेपत्ता भएकी थिइन् । उनी पछिल्लो ४ वर्षदेखि क्यानडामा शरणार्थीको बस्दै आएकी थिइन्। उनी पाकिस्तानमा छँदा उनले महिला अधिकारका विषयमा कुरा अघि बढाएकी थिइन् । उनी सरकार विरोधी रुपमा पनि परिचित छिन् । सन् २०१६ मा बीबीसीको १०० प्रेरणादायी र प्रभावशाली महिलाहरुको सूचीमा उनी छनौट भएकी थिइन् ।