Best Khabar Team | २०२६ पुष १७ गते बिहिबार

---

१३ डिसेम्बर, २०२०
काठमाडौं । आफूहरुले चिनी मिललाई विक्री गरेको उखुको बाँकी रकम दिलाउन सरकारसँग् मागगर्दै तराईका विभिन्न जिल्लाका किसानहरु काठमाडौं आइ पुगेर आन्दोलित भएका छन् । सिँगो विश्व तथा नेपाल समेत कोरानाको चपेटामा रुमलिरहेका बेला तराईका विभिन्न जिल्लाका उखु किसान काठमाडौं आएर फेरि सरकारसँग न्याय मागिरहेका हुन् ।

विगतमा आफूहरुले उत्पादन गरेको उखु विभिन्न चिनी मिललाई विक्री गरिएको भएपनि ती चिनी मिलले आफूहरुलाई बक्यौता रकम दिनका आनाकानी गरेको भन्दै उनीहरुले फेरि काठमाडौंमा आन्दोलन शुरु गरेका हुन् । सरकारसँग भएको सहमतिको करिब १ वर्ष पुग्न लाग्दा उनीहरु फेरि काठमाडौं आएर सरकारसँग न्यायको ढोका ढकढक्याउन बाध्य भएका हुन् । यही माग राखेर गत वर्ष पुसको पहिलो साता उनीहरुले राजधानी केन्द्रीत आन्दोलन गरेका थिए ।

करिब ३ सातासम्म आन्दोलन गरेपछि चिनी मिल सञ्चालक सरकार र किसानहबीच उखुको मुल्य तत्काल उपलब्ध गराउने विषयमा सहमति बनको थियो । सहमतिमा माघ महिनाभित्र किसानलाई बाँकी बक्यौता रकम दिने सहमति सरकार र किसानको उपस्थितिमा चिनी मिल सञ्चालकहरुले गरेका थिए । तर सहमति भएको १ वर्षसम्मपनि अझै अधिकांश चिनी मिलले किसानको बक्यौता रकम नदिएपछि कोरोनाको जोखिमलाई वेवास्ता गर्दै उखु किसानहरु काठमाडौंमा आन्दोलन गर्न आइपुगेका हुन् ।

उनीहरुले आजदेखि काठमाडौंको माइतीघर मण्डला केन्द्रीत आन्दोलन शुरु गरेका छन् । ‘उखु किसान सङ्घर्ष समिति’ को संयोजनमा शुरु भएको आन्दोलनमा सहभागीहरुले विगतमा भएका सहमती कार्यान्वयन गराउनुपर्ने, किसानलाई राज्यले हेर्ने दृष्टिकोण बदल्नुपर्ने तथा किसानलाई पर्याप्त अनुदानको व्यवस्था गरी कृषिकर्म गर्ने वातावरण बनाउनुपर्नेलगायतका माग अघि सारेका छन् ।

हालसम्म किसानहरुलाई श्रीराम चिनी उद्योगले ३२ करोड अन्नपूर्ण चिनी उद्योगले १७ करोड, लुम्बिनी चिनी उद्योगले ८ करोड ४१ लाख र इन्दिरा चिनी उद्योगले ४ करोड ७० लाख बक्यौदा किसानहरुलाई तिर्न बाँकी रहेको उद्योग मन्त्रालयको तथ्यांकमा उल्लेख छ ।

विगतमा भएको आन्दोलनमा एक महिनाभित्र उखुको बाँकी बक्यौता रकम तिर्नका लागि उखुमिल सञ्चालकलाई बाध्य बनाउने सरकारी आश्वासनपछि किसानहरुले आन्दोलन रोकेका थिए । तर यसपटक आश्वासन र सहमतिमा आन्दोलन नरोक्ने भन्दै करिब ३० जना किसानहरु ३ दिनअघि काठमाडौं आएर आन्दोलनमा होमिएका हुन् ।

---

Comment from facebook