देशभर कोरोना संक्रमितको संख्या साढे २ लाख नजिक, निको हुने क्रम पनि बढ्दो

Best Khabar Team | २०७७ मंशिर २८ गते आइतबार

१३ डिसेम्बर, २०२०
काठमाडौं । देशभर कोरोना संक्रमितको संख्या साढे २ लाख नजिक पुगेको छ । स्वास्थ्य तथा जनसंख्या मन्त्रालयले आइतबार अद्यावधिक गरेको तथ्यांक अनुसार देशभर हालसम्म २ लाख ४८ हजार ४ सय २३ जनामा कोरोना संक्रमण देखिएको छ । यो आइतबार अपरान्हसम्मको तथ्यांक रहेको मन्त्रालयले जनाएको छ ।

विगत २४ घण्टामा देशभर ८ सय ३० जनामा कोरोना संक्रमण देखिएको छ । पछिल्लो २४ घण्टाको तथ्यांकलाई आधार बनाउँदा १ हजार ५ सय बढीले कोरोनालाई जितेर स्वास्थ्य लाभ गरेका छन् । यो तथ्यांकलाई आधार बनाउँदा पछिल्ला दिनहरुमा कोरोनालाई जितेर स्वास्थ्य लाभ गर्नेहरुको संख्यापनि उल्लेख रहेको छ ।

मन्त्रालयको तथ्यांक अनुसार हालसम्म २ लाख ३५ हजार ७ सय ३१ जना कोरोना मुक्त भएका छन् । यस्तै कोरोनाका कारण हालसम्म देशभर १ हजार ६ सय ९८ जनाको मृत्यु भएको छ । पछिल्लो २४ घण्टामा देशभर थप ९ जनाको कोरोनाका कारण ज्यान गएको छ ।

मन्त्रालयको तथ्यांक अनुसार हाल ५ सय १६ जना क्वारेन्टिनमा, १० हजार ९ सय ९४ आइसोलेसनमा छन् । यस्तै, २ सय ९४ जनाको आइसीयूमा र ५२ जनाको भेन्टिलेटरमा उपचार भै रहेको छ ।