कोरोना संक्रमणसँगै निमोनिया भएपछि हास्य कलाकार गजुरेल आइसियुमा, अवस्था सामान्य

Best Khabar Team | २०७७ जेठ २९ गते बिहिबार

०६ नोभेम्बर, २०२०
काठमाडौं । केहीदिनअघि कोरोना पुष्टि भएपछि घरमै आइसोलेसनमा उपचाररत बरिष्ठ हास्य कलाकार मनोज गजुरेलमा निमोनिया संक्रमण देखिएको छ । गएको कात्तिक १० गते कोरोना संक्रमण पुष्टि भएपछि उनी घरमै आइसोलेसनमा थिए ।

घरमै रहेका बेला उनमा निमोनियाको समेत संक्रमण देखिएपछि उनको काठमाडौंको बलम्बुस्थित सशस्त्र प्रहरी अस्पतालको ‘कोरोना उपचार कक्षमा’ राखेर उपचार भै रहेको छ । हाल अस्पतालको आइसियु कक्षमा राखेर उपचार भै रहेका गजुरेलको स्वास्थ्य अवस्था सामान्य रहेको अस्पताल स्रोतले जानकारी दिएको छ ।

उनको अवस्था खतरामुक्त रहेको अस्पतालको भनाई छ । २ दिनअघि एक्कासी कोरोनासंग मिल्दो लक्षण देखिएर स्वास्थ्यमा थप समस्या देखिएपनि उनलाई उपचारको लागि अस्पताल भर्ना गरिएको हो । यसैबीच गजुरेलकी पूर्व पत्नी मिना ढकालले सामाजिक सञ्जालमार्फत् उनको स्वास्थ्यलाभको कामना गरेकी छन् ।

आफ्ना पूर्व पतिसँग जस्तोसुकै अप्ठेरोसँग सामना गर्ने क्षमता भएकोले कोरोनालाई जित्नेमा आफू आशावादी भएको विश्वास व्यक्त गरेकी छन् ।