कोरोनाका कारण हालसम्म विदेशमा रहेका २ सय ४३ नेपालीको मृत्यु

Best Khabar Team | २०७७ भाद्र २८ गते आइतबार

१३ सेप्टेम्बर, २०२०
दोहा, कतार । कोरोना भाइरसको संक्रमण फैलिएदेखि हालसम्म (स्थानीय समय अनुसार आइतबार बिहान ९ बजेसम्म) विदेशमा रहेका २ सय ४३ जना नेपालीको ज्यान गएको छ । विश्वका विभिन्न देशमा रहेका नेपाली दूतावास तथा गैर आवासीय नेपाली संघले उपलब्ध गराएको तथ्यांक अनुसार अमेरिका, जापान, बेलायत, स्पेनलगायत विश्वका करिब डेढ दर्जन बढी देशमा हालसम्म २ सय ४३ जनाले कोरोनाका कारण ज्यान गुमाएका हुन् ।

पछिल्लो सातामात्रै विश्वका विभिन्न देशमा थप ४३ जना नेपालीको ज्यान गएको गैर आवासीय नेपाली संघ स्वास्थ्य समितिका संयोजक डा. सञ्जिव सापकोटाले जानकारी गराएका छन् । उनका अनुसार साउदी अरब र बेलायतमा सबैभन्दा धेरै नेपाली कोरोनाका कारण मृत्युबरण गर्न पुगेका छन् । साउदीमा हालसम्म ५२ जनाले ज्यान गुमाएका छन् भने कतार बेलायतलगायतका देशमा पनि कोरोना कारण नेपालीले ज्यान गुमाएका छन् ।

यसका अलावा पोल्याण्ड, अमेरिका, स्पेन, जापान, आएरल्याण्ड, कतारलगायतका देशका नेपालीको पनि कोरोनाका कारण ज्यान गएको एनआरएनले जनाएको छ ।