कोरोना संक्रमणमा भारतले राख्यो विश्वमै नयाँ रेकर्ड : एकैदिन ८३ हजार भन्दा बढी संक्रमित भेटिए

Best Khabar Team | २०७७ भाद्र १८ गते बिहिबार

०३ सेप्टेम्बर, २०२०
नयाँदिल्ली । विश्वमै २४ घण्टाभित्र सबैभन्दा धेरै कोरोना संक्रमित भेटिएको देशको सूचीको पहिलो नम्बरमा भारत परेको छ । भारतले पछिल्लो २४ घण्टामा (मंगलबार अपरान्हदेखि बुधबार अपरान्हसम्म) हालसम्मकै सबैभन्दा धेरै कोरोना संक्रमित भेटिएको तथ्य सार्वजनिक गरेको छ ।

भारत सरकारको स्वास्थ्य मन्त्रालयले जारी गरेको तथ्यांक अनुसार पछिल्लो २४ घण्टामा भारतमा ८३ हजार २९ जना कोरोना संक्रमित भेटिएका छन् । जुन विश्वमा एउटै देशमा एकैदिन भेटिएका कोरोना संक्रमितमध्ये अहिलेसम्मकै सबैभन्दा धेरै संख्याा हो । यसअघि पहिलो पटक जुलाई १६ मा विश्वमा एकैदिन सबैभन्दा धेरै कोरोना संक्रमित अमेरिकामा भेटिएको रेकर्ड छ । जहाँ ७७ हजार २ सय ५५ जना कोरोना संक्रमित भेटिएका थिए ।

तर यो रेकर्डलाई पछि पार्दै भारतले अगस्ट २९ मा मात्रै ७८ हजार ९ सय ३ जना संक्रमित फेला परेको तथ्य सार्वजनिक गरेको थियो । भारतमा कोरोनाका कारण हालसम्म ६७ हजार ४ सय १५ जनाको कोरोनाकै कारण ज्यान गै सकेको छ भने हालसम्म ३८ लाख ४५ हजार भन्दा बढीमा कोरोना संक्रमण फैलिएको छ । ३० लाख भन्दा बढी कोरोना मुक्त भएका छन् । भारतमा महाराष्ट्र सबैभन्दा बढी प्रभावित राज्यको रुपमा रहेको छ । यसका साथै नयाँदिल्ली, उत्तरप्रदेशलगायतका ठाउँहरुमा पनि कोरोना संक्रमण तीव्र रुपमा फैलिएको छ ।