Best Khabar Team | २०२६ पुष १७ गते बिहिबार

---

१४ अगस्ट, २०२०
काठमाडौं । पछिल्ला दिनहरुमा देशव्यापी रुपमा कोरोना भाइरसबाट संक्रमित हुनेहरुको संख्या ह्वात्तै बढेको छ । सरकारले लकडाउन खुकुलो गरेसँगै विभिन्न माध्यमबाट काठमाडौंलगायत देशका विभिन्न जिल्लामा आउने तथा जाने मानिसहरुको संख्या बढेको छ । योसँगै संक्रमितको संख्या पनि बढेको हो ।

सरकारले गएको साउन ८ गतेदेखि देशव्यापी रुपमा लकडाउन खुल्ला गरेर जिल्ला भित्र गाडी सञ्चालनका लागि अनुमति दिएको थियो । यसलगत्तै पछिल्ला २ सातायता उपत्यकालगायत देशव्यापी रुपमा कोरोना संक्रमित बढेका छन् । पछिल्लो २४ घण्टायता मात्रै देशभर थप ५ सय ९४ जनामा कोरोना संक्रमण देखिएको छ ।

स्वास्थ्य तथा जनसंख्या मन्त्रालयले आज गरेको नियमित प्रेस ब्रिफिङ्ग अनुसार काठमाडौं उपत्यकाभित्र मात्रै पछिल्ला २४ घण्टायता १ सय १९ जनामा कोरोना संक्रमण देखिएको छ । यो सँगै देशभर अहिलेसम्म २५ हजार ५ सय ५१ जनामा कोरोना संक्रमण देखिएको छ ।

ती मध्ये ७ हजार ९ सय १३ जना संक्रमित अझै विभिन्न अस्पताल र आइसोलेसन सेन्टरमा रहेका छन् । बाँकी भने उपचारपछि घर फर्केका छन् । अर्थात् १७ हजार ७७ जनाले कोरोनालाई जितेका छन् । कोरोना भाइरसको संक्रमणका कारण देशभर हालसम्म ९९ जनाको निधन भएको छ ।

---

Comment from facebook