अमेरिकी राष्ट्रपतिले पत्रकार सम्मेलन गरिरहँदा ह्वाईट हाउस बाहिर गोली चल्यो, ट्रम्पको पत्रकार सम्मेलन स्थगित (भिडियोसहित)

Best Khabar Team | २०७७ कार्तिक २३ गते आइतबार

११ अगस्ट, २०२०
न्यूर्योक । अमेरिकी राष्ट्रपति डोनाल्ड ट्रम्पले ह्वाईट हाउसस्थित राष्ट्रपति कार्यालयभित्र पत्रकार सम्मेलन गरिरहँदा बाहिर गोली चलेको आवाज आयो । यो आवाज उनको सुरक्षामा खटिएका सुरक्षाकर्मी तथा अन्य अधिकारीहरुले राम्ररी सुने । आवाज त्यहाँ जम्मा भएका पत्रकारहरुको कानमा समेत प-यो ।

तर गोलीको आवाज आइरहँदा पनि अमेरिकी राष्ट्रपति ट्रम्प आफ्नो भनाई पत्रकारहरुमाझ प्रस्तुत गरिरहेका थिए । एक्कासी उनको सुरक्षामा खटिएका एकजना सुरक्षाकर्मीले उनलाई रोके । ट्रम्पको पत्रकार सम्मेलनस्थलको दाहिनेपछि ढोकाको पछाडि बसिरहेका ती सुरक्षाकर्मीले ट्रम्पलाई आएर केही भने र अनि कान नजिकै गएर थप कुराकानी गरे । त्यसपछि उनले ट्रम्पलाई लिएर ढोकाभित्रपछि गए ।

पत्रकार सम्मेलनमा ट्रम्पको आसपासमा रहेका ह्वाईट हाउसका अन्य पदाधिकारी तथा सुरक्षाकर्मीपनि त्यसपछि बसिरहेको कुर्ची छाडेर ट्रम्प गएतिरै लागे । त्यतिबेलासम्म गोली चलिरहेको आवाज स्पष्टसँग सुनिइरहेको थियो । घटनाको नौ मिनेट पछि ट्रम्प फेरि पत्रकार सम्मेलन स्थलमै फर्केर घटनाको बारेमा जानकारी गराएका थिए । उनले पत्रकारहरुलाई बाहिर गोली चलेको र घटना के हो भन्ने बारेमा आफूले विस्तृत थाहा नपाएको बताएका थिए ।

घटना के थियो ?
अमेरिकाको गुप्त निकायले ह्वाईट हाउस बाहिर एकजना ५१ वर्षका संदिग्ध व्यक्तिलाई गोली हानेपछि अमेरिकी राष्ट्रपति भवन भित्र डोनाल्ड ट्रम्पको ‘प्रेसमिट’ नै स्थगित भएको थियो । बाहिर गोली चलेको आवाज राष्ट्रपति भवन बाहिरका विशेष प्रहरीले राष्ट्रपति भवनभित्र ट्रम्पको सुरक्षामा खटिएका सुरक्षा अधिकारीलाई जानकारी गराएका थिए ।

त्यसलगत्तै ती अधिकारीले राष्ट्रपति ट्रम्पलाई घटनाको जानकारी गराउँदै पत्रकार सम्मेलन बीचमा रोकेर भित्र लगेका थिए । सिबिएस न्यूजका अनुसार राष्ट्रपति भवन बाहिर एकजना संदिग्ध व्यक्तिलाई प्रहरीले नियन्त्रणमा लिन खोज्दा उनले शंकास्पद क्रियाकलाप गरेपछि गोली प्रहार गरिएको सुरक्षा अधिकारीहरुले जनाएका छन् ।

प्रहरीको गोली लागेर घाइते भएका ती व्यक्तिको अहिले स्थानीय अस्पतालमा उपचार भै रहेको छ । ५१ वर्षका एकजना संदिग्ध व्यक्तिले आफ्नो साथमा हतियार रहेको भन्दै सुरक्षाकर्मीलाई धम्क्याईरहेका थिए । यसपछि उनले शरीरको कपडाभित्रबाट पेस्तोल निकालेर नजिकै रहेको रुखलाई ताकेर फाएरिङ्ग खोलेका थिए । त्यसपछि जवाफमा प्रहरीले उनीमाथि गोली प्रहार गरेको थियो । घटना अमेरिकी समय अनुसार सोमबार साँझ ५ बजेर ५५ मिनेट जाँदा भएको बताइएको छ। भिडियो हेर्न तलको लिंकमा क्लिक गर्नुहोला ।