अगस्ट महिना (भदौ १५ सम्म) भर आन्तरिक तथा बाह्य हवाई सेवा बन्द गर्ने सरकारको निर्णय

Best Khabar Team | २०७७ श्रावण २६ गते सोमबार

१० अगस्ट, २०२०
काठमाडौं । सरकारले यसअघि गरेको निर्णयलाई पुर्नविचार गर्दै आन्तरिक तथा बाह्य हवाई उडान आगामी अगस्ट ३१ अर्थात् भदौ १५ गतेसम्मका लागि बन्द गर्ने निर्णय गरेको छ । यसअघि सरकारले भदौ १ बाट आन्तरिक तथा बाह्य हवाई उडान सूचारु गर्ने निर्णय गरेको भएपनि पछिल्ला दिनमा कोरोना संक्रमितको संख्या ह्वात्तै बढेपछि सरकारले आज थप १५ दिन हवाई सेवा बन्द गर्ने निर्णय यथावत् राख्ने निर्णय गरेको हो ।

नेपाल सरकार मन्त्री परिषद्को आज बसेको बैठकले आगामी भदौ १५ गतेसम्मका लागि हवाई सेवा बन्द गर्ने निर्णय गरेको सरकारा प्रवक्ताले जानकारी दिएका छन् । भदौ १५ पछि पनि परिस्थिति हेरेर हवाई सेवा सूचारु गर्न सकिने बताइएको छ । गएको चैत्र ५ गतेदेखि देशव्यापी रुपमा लकडाउन घोषणा गरेसँगै ११ गतेदेखि देश तथा विदेशबाट हुने नियमित यात्रुबाहक उडान बन्द भएको छ भने अहिले चार्डर फ्लाईट (उद्दार उडान) मात्रै भै रहेको छ ।

पछिल्ला दिनहरुमा सरकारले सूची बनाएर निश्चित देशबाट चार्डर उडानमार्फत् नेपाली यात्रुहरुलाई नेपाल ल्याइरहेको छ भने चार्टर उडान मार्फत् नेपालबाट हुने बाह्य उडानपनि भै रहेको छ । तर नियमित रुपमा यात्रुबाहक उडान हुन भने अझैपनि कुर्नुपर्ने भएको छ ।

पछिल्ला दिनमा काठमाडौं उपत्यकालगायत देशका विभिन्न जिल्लामा कोरोना संक्रमितको संख्या ह्वात्तै बढ्न थालेपछि सरकारले विमान सूचारु गर्ने यसअघिको निर्णमा पुर्नविचार गरेको हो ।

Comment from facebook