पछिल्लो २४ घण्टाको कोरोना अपडेट : थप ५ को मृत्यु, ४६४ जना नयाँ संक्रमित भेटिए

Best Khabar Team | २०७७ श्रावण २३ गते शुक्रबार

०७ अगस्ट, २०२०
काठमाडौं । पछिल्लो २४ घण्टामा देशभर थप ५ जनाको कोरोनाकै कारण ज्यान गएको छ । स्वास्थ्य मन्त्रालयले आज गरेको नियमित ‘प्रेस विफ्रिङ्ग’मा दिइएको जानकारी अनुसार काठमाडौंसहित देशका विभिन्न जिल्लामा गरी थप ५ जनाको कोरोनाका कारण ज्यान गएको छ । यही अवधिमा देशभर थप ४ सय ६४ जनामा कोरोना संक्रमण देखिएको छ ।

संक्रमितमध्ये १ सय ६ जना काठमाडौं उपत्यकाभित्रका रहेका छन् । मन्त्रालयका अनुसार काठमाडौंमा ९२ जना, ललितपुरमा १० जना र भक्तपुरमा ४ गरी कुल १ सय ६ जना संक्रमित उपत्यकाभित्र थपिएका हुन् । यो अवधिमा देशभरबाट ४ सय १६ जना उपचारपछि घर फर्केका छन् । हालसम्म कोरोनाका कारण २२ हजार २ सय भन्दा बढी संक्रमित बनेका छन् भने ७० जनाको ज्यान गै सकेको छ । यस्तै कोरोना संक्रमणबाट हालसम्म १५ हजार ८ सय भन्दा बढी मुक्त भएका छन् ।