काठमाडौंको टंगालस्थित अख्तियार मुख्यालयमा गरिएको स्वाब परीक्षणमा १५ जनामा कोरोना संक्रमण, सक्रमितमध्ये अधिकांश प्रहरी

Best Khabar Team | २०७७ श्रावण २० गते मंगलबार

०४ अगस्ट, २०२०
काठमाडौं । काठमाडौंको टंगालमा रहेको अख्तियार दुरुपयोग अनुसन्धान आयोगको मुख्यालयमा २ दिन अघि गरिएको स्वाब परीक्षणका क्रममा १५ जना कर्मचारीहरुमा कोरोना संक्रमण पुष्टि भएको छ । स्वास्थ्य मन्त्रालयको समन्वयमा गरिएको परीक्षणका क्रममा भेटिएका संक्रमितमध्ये धेरैजसो प्रहरी रहेको बताइएको छ ।

उनीहरु विगत लामो समयदेखि अख्तियार दुरुपयोग अनुसन्धान आयोगले गर्ने विभिन्न अनुसन्धान र कारबाहीमा खटिँदै आएका प्रहरी कर्मचारी भएको मन्त्रालय स्रोतको भनाई छ । १५ जना कर्मचारीमा कोरोना देखिएपछि उनीहरुको सम्पर्कमा रहेका अन्य व्यक्तिहरुको बारेमा पनि विस्तृत वितरण निकाल्ने काम भै रहेको छ ।

संक्रमितहरुलाई अहिले आइसोलेसन केन्द्रमा पठाउने तयारी भै रहेको बताइएको छ । स्रोतका अनुसार केही समय अघि पूर्वी नेपालमा अख्तियारको क्षेत्रीय कार्यालयले गरेको अनुसन्धानका क्रममा सहभागी भएर फर्केका केही प्रहरी कर्मचारीहरुमार्फत् मुख्यालयका अन्यमा कोरोना फैलिएको आशंका गरिएको छ । गएको आइतबार अख्तियारको मुख्यालयमा गरिएको स्वाब परीक्षणको रिपोर्ट आज प्राप्त भएको बताइएको छ ।

प्रहरी कर्मचारीका अलावा अनुसन्धान प्रहरीसँगै खटिएका अख्तियारका केही कर्मचारीहरुमा समेत कोरोना संक्रमण भेटिएको प्रहरीको भनाई छ । केही समयअघिमात्रै काठमाडौंको नक्सालस्थित प्रहरी मुख्यालयमा कार्यरत ५२ जना भन्दा बढी प्रहरी कर्मचारीमा कोरोना संक्रमण पुष्टि भएको थियो । उनीहरु मुख्यालयको सञ्चार तथा सवारी शाखामा कार्यरत कर्मचारी रहेका थिए ।

Comment from facebook