काठमाडौं उपत्यकामा ४५ सहित देशभर थप २७४ जनामा कोरोना संक्रमण

Best Khabar Team | २०७७ श्रावण १५ गते बिहिबार

३० जुलाई, २०२०
काठमाडौं । पछिल्लो २४ घण्टामा काठमाडौं उपत्यकामा मात्रै ४५ जनामा कोरोना संक्रमण पुष्टि भएको छ । स्वास्थ तथा जनसंख्या मन्त्रालयको नियमित पत्रकार सम्मेलनका क्रममा केहीबेर अघि सार्वजनिक गरिएको विवरण अनुसार काठमाडौं उपत्यका भित्रका ३ जिल्लामा २४ घण्टा यता थप ४५ जनामा कोरोना संक्रमण देखिएको हो ।

काठमाडौं, ललितपुर र भक्तपुरका विभिन्न अस्पतालमा गरिएको स्वाब परीक्षणको रिर्पोट अनुसार उनीहरुमा कोरोना संक्रमण पुष्टि भएको मन्त्रालयले जनाएको छ । जस अनुसार सबैभन्दा धेरै काठमाडौं जिल्लामा ४१ जनामा कोरोना संक्रमण देखिएको छ । यस्तै भक्तपुरमा थप दुई जना र ललितपुरमा २ जनामा कोरोना संक्रमण देखिएको मन्त्रालयको भनाई छ । उपत्यकामा ४५ सहित देशभर पछिल्लो २४ घण्टामा थप २ सय ७४ जनामा कोरोना संक्रमण देखिएको मन्त्रालयले जनाएको छ ।

योसँगै देशभर कोरोना संक्रमितको संख्या १९ हजार ५ सय ४७ पुगेको छ । यस्तै हालसम् १४ हजार २ सय ४८ जना कोरोना भाइरसबाट मुक्त भएर घर फर्केका छन् भने ४९ जनाको कोरोनाकै कारण ज्यान गएको छ ।