नेपालमा फेरि बढे कोरोना संक्रमित, पछिल्लो २४ घण्टामा ३ सय ११ मा संक्रमण पुष्टि

Best Khabar Team | २०७७ श्रावण १३ गते मंगलबार

२९ जुलाई, २०२०
काठमाडौं । नेपालमा पछिल्लो २४ घण्टामा कोरोना संक्रमितको संख्या ह्वात्तै बढेको छ । सरकारले साउन ८ गतेदेखि लकडाउन खुल्ला भएको जानकारी गराएपछि आज एकैदिन ३ सय ११ जनामा कोरोना संक्रमण पुष्टि भएको छ । हिजो कुल १ सय ३९ जनामा कोरोना संक्रमण पुष्टि भएकोमा त्यसयता आज सरकारले अद्याबधिक गराएको तथ्यांक अनुसार थप ३ सय ११ जनामा कोरोना संक्रमण देखिएको छ ।

दुईदिनअघि मात्रैको तथ्यांक हेर्ने हो भने पनि १ सय ३० जनामा कोरोना संक्रमण देखिएको थियो । लकडाउन खुल्ला भएसँगै मानिसहरुको चाप बढ्दै जाँदा जोखिम पनि बढेको र त्यसैका कारण संक्रमितको संख्या बढ्दै गएको विज्ञहरुले बताएका छन् । जिल्ला प्रहरी कार्यालय स्याङ्गजामा कार्यरत ३७ जना र काठमाडौंस्थित प्रहरी मुख्यालयमा कार्यरत २३ जना प्रहरीमा कोरोना देखिएसँगै कोरोना समुदायमै फैलिएको हनुसक्ने आशंका गरिएको छ ।

यस्तै पर्सा कपिलबस्तुमा पनि एक व्यक्तिबाट अर्को व्यक्तिमा कोरोना संक्रमण फैलिएको देखिएको त्यहाँ पछिल्लो पटक भेटिएका संक्रमितहरुको तथ्यांकले देखाएको छ । आज थप ३ सय ११ जनामा कोरोना संक्रमण देखिएसँगै नेपालमा अहिलेसम्म १९ हजार ६३ जनामा कोरोना संक्रमण भएको पुष्टि भएको छ ।

कोरोनाका कारण हालसम्म ४८ जनाले ज्यान गुमाइसकेका छन् । यस्तै कुल १३ हजार ७ सय ५४ जनाले अहिलेसम्म कोरोनालाई जितेका छन् ।

Comment from facebook