चीनले अमेरिकालाई भन्यो : चीनमा रहेको अमेरिकी बाणिज्य दुतावास तत्काल बन्द गर

Best Khabar Team | २०७७ श्रावण ९ गते शुक्रबार

२४ जुलाई, २०२०
बेइजिङ्ग, चीन । शुक्रबार मध्यरातसम्म अमेरिकाको टेक्सासस्थित चिनियाँ वाणिज्य दूतावास बन्द गर्नका लागि चीनलाई अमेरिकाले चेतावनी दिएपछि त्यसको जवाफमा चीनले पनि आफ्नो भूमिमा रहेको चिनियाँ वाणिज्य दूतावास बन्द गर्न अमेरिकालाई आग्रह गरेको छ । चीनको दक्षिण–पश्चिमी सहर छेङ्दुमा रहेको अमेरिकी बाणिज्य दुतावासलाई तत्काल बन्द गर्नका लागि चीनले अमेरिकालाई भनेको हो ।

**चीनको दक्षिण–पश्चिमी सहर छेङ्दुमा रहेको अमेरिकी बाणिज्य दुतावास** । तस्वीर साभार : U.S. Embassy & Consulates in China

पछिल्लो समयमा कोरोना भाइरस चीनले ल्याबमा उत्पादन गरेर विश्वभर फैलाएको आरोप अमेरिकाले चीनमाथि लगाउँदै आएपछि यी दुईदेशबीचको सम्बन्ध थप तनावपूर्ण बन्दै गएको छ । अमेरिकाले चीनले भाइरसको बहानामा आफ्नो व्यापारमा एकल साम्राज्य स्थापित गरेको आरोप लगाउँदै आएको छ । चिनियाँ विदेश मन्त्रालयले एक विज्ञप्ति निकालेर अमेरिकाले हालै टेक्सासमा रहेको आफ्नो बाणिज्य दूतावास बन्द गर्न निर्देशन दिनु अत्यन्तै अनुचित कार्य भएको भन्दै त्यसको जावफमा आफूहरुले पनि छेङ्दुमा रहेको वाणिज्य दूतावास बन्द गर्न भनेको स्पष्ट पारेको छ ।

अमेरिकाले चीनमाथि विभिन्न खाले आरोप लगाउँदै आएको दूतावास बन्द गर्नका लागि निर्देशन दिने कार्यले उत्पन्न परिस्थितिको भागिदार पनि अमेरिका नै विज्ञप्तिमा उल्लेख छ । बिबिसीका अनुसार सन् १९८५ मा चीन स्वासासित तिब्बतको नजिक छेङ्दु शहरमा स्थापना भएको अमेरिकी वाणिज्य दूतावासमा २ सय भन्दा बढी कर्मचारी कार्यरत रहेका छन् ।

केही समयअघि अमेरिकाले आफ्नो अमेरिकाको टेक्सासमा रहेको वाणिज्य दूतावास बन्द गर्न चीनलाई निर्देशन दिएको थियो । त्यसको समयसीमा शुक्रबारसम्मका लागि तोकिएको छ ।