सर्वोच्चले साढे १६ वर्ष जेल सजायाँ घटाई दिएपछि पूर्वडिआइजी कोइराला थुनामुक्त

Best Khabar Team | २०७७ श्रावण ८ गते बिहिबार

२३ जुलाई, २०२०
काठमाडौं । आफ्नै श्रीमतीको हत्या गरी शव जलाएर काठमाडौं फर्कँदै गर्दा पक्राउ परेका सशस्त्र प्रहरीका पूर्वडीआइजी रञ्जन कोइराला जेल सजायाँको २ तिहाई भाग पनि भुक्तान नगरी जेल मुक्त भएका छन् । २०६८ साल माघमा श्रीमतीको हत्या गरेर मकवानपुरको पालुङ्गस्थित जंगलमा शव जलाएर काठमाडौं फर्कँदै गर्दा उनलाई प्रहरीले पक्राउ गरेको थियो ।

पछि घटनाको अनुसन्धानका क्रममा उनले नै घरायसी विवादका कारण श्रीमतीको हत्या गरेको र शव समेत जलाएको प्रमाणित भएपछि काठमाडौं जिल्ला अदालते उनलाई सर्वस्वसहित जन्मकैदको सजायाँ सुनाएको थियो । उनी २०७१ साल बैशाख ७ गतेदेखि उनी डिल्लीबजारस्थित कारागारमा जेल सजायाँ भुक्तान गर्दै आएका थिए । सर्वोच्च अदालतले केहीदिनअघि उनको बाँकी कैद मिनाहा गरिदिएको थियो ।

प्रधानन्यायाधीश चोलेन्द्र शमशेर जबरासहितको इजलासले करिब १६ वर्ष ६ महिनाको बाँकी जेल भुक्तानको समयलाई मिनाह गर्दै कोइरालालाई थुनामुक्त गर्न आदेश दिएको थियो । जिल्ला अदालतको निर्णय अनुसार यदि जेल समय भुक्तान गरिरहेको भए कोइराला विक्रम सम्वत २०९३ सालमा जेल मुक्त हुन थिए । तर गत असारको दोश्रो साता अदालतले यो निर्णय गरेसँगै आजबाट उनी थुनामुक्त भएका हुन् ।