धादिङ्को त्रिपुरासुन्दरी गाउँपालिकामा पहिरोमा परी एकै परिवारका ३ को मृत्यु

Best Khabar Team | २०७७ श्रावण ६ गते मंगलबार

२१ जुलाई, २०२०
सल्यानटार, धादिङ् । विगत चार दिनदेखि परेको अविरल वर्षात्का कारण आएको पहिरोमा परी धादिङ्गको त्रिपुरासुन्दरी गाउँपालिकामा एकै परिवारका ३ जनाको ज्यान गएको छ । त्रिपुरासुन्दरी गाउँपालिकाको (साविकको आगिञ्चोक गाविस) गोलाङ्गमा माथिबाट आएको पहिरोले स्थानीय मिलन खाँडको घर बगाएको हो ।

घर बगाउँदा खाँडसहित उनकी श्रीमती सम्झना खाँड र उनीहरुका १ छोरीको ज्यान गएको प्रहरीको भनाई छ । गएराति भीषण वर्षात्सँगै आएको पहिरोपछि खाँडको घर बगाएको र सोही क्रममा उनीहरुको ज्यान गएको बताइएको छ ।

आज बिहान स्थानीय वासिन्दा र सल्यानटारबाट गएको प्रहरी टोलीले घटनास्थलमा पुरिएका उनीहरुको शव निकालको स्थानीय वासिन्दा राजन बुर्लाकोटीले जानकारी दिए । पहिरोका कारण गोलाङ्गको काफलपानी क्षेत्रका आधादर्जन बढी बस्तीहरु समेत जोखिममा परेको बुर्लाकोटीले बताएका छन् ।

वर्षात्का कारण धादिङ्गको उत्तरी क्षेत्रका दजनौं स्थानमा पहिरो गएको छ भने कतिपय स्थानमा जिल्ला सदरमुकामसँग जोड्ने सडक सञ्जालसमेत पूर्णरुपमा अवरुद्ध भएको छ ।