काठमाडौं उपत्यकाभित्र थप ३ जनामा कोरोना संक्रमण

Best Khabar Team | २०७७ श्रावण २ गते शुक्रबार

१७ जुलाई, २०२०
काठमाडौं । पछिल्लो २४ घण्टायता काठमाडौं उपत्यकाभित्र थप ३ जनामा कोरोना संक्रमण पुष्टि भएको छ । स्वास्थ्य मन्त्रालयले आज गरेको पत्रकार सम्मेलनमा दिइएको जानकारी अनुसार २४ घण्टायता काठमाडौंका १ जना र भक्तपुरका २ जनामा कोरोना संक्रमण देखिएको हो । काठमाडौंको टेकुमा रहेको केन्द्रीय प्रयोगशाला तथा पाटन अस्पतालमा गरिएको स्वाब परीक्षणका क्रममा उनीहरुमा कोरोना पुष्टि भएको हो ।

संक्रमित तीनै जनाको अवस्था सामान्य रहेको र उनीहरु अहिले चिकित्सकको निगरानीमा रहेको बताइएको छ । यसैबीच मन्त्रालयले काठमाडौं उपत्यकाभित्र समुदायमा कोरोना भाइरस फैलिएको कुनै प्रमाण नरहेको भन्दै आतंकिन नहुन सबैलाई अनुरोध गरेको छ ।

संक्रमित मध्ये दुईजना विदेशबाट आएको र एकजना भने व्यवसाय गर्दै आएका व्यक्ति रहेका छन् । काठमाडौंको व्यस्त स्थानबाट गरिएको स्वाब परीक्षणका क्रममा ४ हजार ८ सय जना मध्ये ३ जना मात्रै संक्रमण देखिएको मन्त्रालयको भनाई छ ।

मन्त्रालयका प्रवक्ता जागेश्वर गौतमले आज पत्रकारसम्मेलनमा अहिलेसम्म उपत्यकामा कोरोना समुदायस्तरमा फैलिइ नसकेको बताए ।

Comment from facebook