उपत्यकाको बयोधा अस्पतालका स्वास्थ्यकर्मीमार्फत ११ जनामा कोरोना संक्रमण फैलियो

Best Khabar Team | २०७७ असार २८ गते आइतबार

१२ जुलाई, २०२०
काठमाडौं । काठमाडौंमा एकजना स्वास्थ्यकर्मीमार्फत् उनको घरका ९ जनासहित कुल ११ जनामा कोरोना संक्रमण फैलिएको छ । काठमाडौंको बल्खुमा रहेको बयोधा अस्पतालमा कार्यरत ल्याब टेक्निसियनमा कोरोना संक्रमण भएको र उनसँगै उनका घरका ९ जनामा पनि संक्रमण पुष्टि भएको अस्पताल स्रोतले जनाएको छ ।

केही दिन अघि उनमा गरिएको स्वाब परीक्षणका क्रममा उनमा कोरोना पुष्टि भएको थियो । तर पछि घरका अन्य ९ जना सदस्यको नमुना परीक्षणका क्रममा पोटेजिभ रिपोर्ट आएको थियो । ती स्वास्थ्यकर्मी ललितपुरको महालक्ष्मी नगरपालिका वडा नम्बर ८ मा बस्दै आएका थिए । उनी बस्ने वडाका वडा अध्यक्षका दुईजना छोराहरुलाई पनि कोरोना संक्रमण भएको र उनीहरु पनि चिकित्सक भएको बताइएको छ ।

ती ल्याब टेक्निसियनकै कारण ११ जनामै कोरोना संक्रमण फैलिएको पुष्टि भएपछि अहिले महालक्ष्मी नगरपालिकाको वडा नम्बर ७, ८ र ९ सिल गरिएको छ । संक्रमित सबैलाई चिकित्सकको निगरानीमा आइसोलेसनमा राखेर उपचार थालिएको छ । यस्तै उनको सम्पर्कमा आएकाहरुको बारेमा जानकारी लिने काम भै रहेको बताइएको छ ।

अस्पतालमा कार्यरत ती ल्याब टेक्निसियनलाई ल्याबमै काम गर्दाका बेला कोरोना संक्रमण भएको हुनसक्ने आशंका गरिएको छ ।