Best Khabar Team | २०७७ कार्तिक २२ गते शनिबार

---

११ जुलाई, २०२०
काठमाडौं । काठमाडौंमा कोरोना भाइरसका कारण एकजनाको मृत्यु भएसँगै देशभर कोरोनाका कारण ज्यान गुमाउनेको संख्या ३६ पुगेको छ । मृगौलासम्बन्धी समस्याका कारण उपचारका लागि काठमाडौंको सिनामंगलमा रहेको ‘काठमाडौं मेडिकल कलेजमा’ भर्ना भएका ती पुरुषको असार २५ गते उपचारकै क्रममा ज्यान गएको थियो ।

मृत्यु पछि गरिएको उनको स्वाब परीक्षणका क्रममा उनमा कोरोना संक्रमण पुष्टि भएको रिपोर्ट हिजो साँझ आएको अस्पताल स्रोतले जानकारी दिएको छ । काठमाडौंको उत्तरी क्षेत्रमा अवस्थित गोकर्णका स्थानीय वासिन्दा ५४ वर्षका ती पुरुष नेपालमा कोरोनाबाट ज्यान गुमाउने ३६ औं व्यक्ति हुन् । पछिल्लो पटक अस्पताल भर्ना हुँदा उनमा निमोनियाको समेत समस्या थियो । अस्पतालमा भर्ना हुँदै नै उनमा कोरोना सँग सम्बन्धित लक्षण देखिएपछि उनको स्वाब परीक्षण गरिएको अस्पतालले जनाएको छ ।

यद्यपि स्वाब संकलन भने उनको मृत्यु भएपछि मात्रै गरिएको थियो । उनको शवलाई नेपाली सेनाले सुरक्षित तरिकाले गाडेको छ । नेपालमा हालसम्म कोरोनाका कारण १६ हजार भन्दा बढी संक्रमित बनेका छन् भने ८ हजार भन्दा बढी निको भएर घर फर्केका छन् । पछिल्लो समयमा देशको राजधानी काठमाडौंमा कोरोना संक्रमणको दर तीब्र बनेको छ ।

लकडाउन खुकुलो भएसँगै देशभरबाट मानिसहरु विभिन्न बहानामा काठमाडौं आउने क्रम तीब्र बनेसँगै जोखिम समेत बढेको हो ।

---

Comment from facebook