जाजरकोट पहिरो : वेपत्ता पाँचको अवस्था अझै अज्ञात

Best Khabar Team | २०७७ असार २७ गते शनिबार

११ जुलाई, २०२०
बारेकोट, जाजरकोट । जाजरकोटमा हिजो राति गएको पहिरोमा परी वेपत्ता भएका बारेकोटका ५ जना स्थानीयको अवस्था अहिलेसम्म थाहा हुन सकेको छैन । हिजो दिनभर र आज पनि बिहानैदेखि उनीहरुको खोजी गरिएको भएपनि भएपनि अहिलेसम्म उनीहरुको अवस्था पत्ता लाग्न सकेको छैन । पहिरोमा वेपत्ता भएकामध्ये सार्की टोलका ७ जनाको शव भेटिएपनि ५ जनाको भने अहिलेसम्म अवस्था थाहा हुन सकेको छैन ।

बिहीबार राति परेको अविरल वर्षात्पछि आएको पहिरोमा परी स्थानीय सार्की टोलका २ घर बगाएको थियो । वेपत्ताको खोजी कार्यका लागि नेपाली सेना र नेपाल प्रहरीको टोली करिब ४८ घण्टादेखि नै खटिईरहेको छ । तर पनि उनीहरुको अवस्था सार्वजनिक हुन सकेको छैन ।

सो स्थानमा अहिले पनि निरन्तर रुपमा पानी परिरहेको कारण पहिरोकोका कारण विस्थापित बनेका तथा वेपत्ता बनेकाहरुको उद्दार तथा खोजी कार्यमा कठिनाई भएको उद्दारमा खटिएका प्रहरीको भनाई छ । जिल्लाको बारेकोट गाउँपालिका वडा नम्बर ४ का स्थानीयको ३२ वटा घर तथा केही गोठहरु पहिरोले बगाएको थियो ।

साथै सो क्षेत्र आपसापसका दर्जनौं घरहरु अहिले पहिरोका जोखिममा रहेकोले उनीहरुलाई त्यहाँबाट सुरक्षित स्थानमा सार्नका लागि प्रयास भै रहेको छ । गाउँपालिकाका अनुसार ती क्षेत्रका करिब ५ दर्जन घरहरु जोखिममा परेको र तत्काल उद्दार गर्नुपर्ने अवस्था रहेको छ ।