नेपालमा कोरोना : संक्रमितको संख्या साढे १६ हजार नाघ्यो, ८ हजार बढीले कोरोनालाई जिते

Best Khabar Team | २०७७ असार २६ गते शुक्रबार

१० जुलाई, २०२०
काठमाडौं । देशका विभिन्न भागमा हालसम्म कोरोना संक्रमितको संख्या साढे १६ हजार नाघेको छ । स्वास्थ्य तथा जनसंख्या मन्त्रालयले आज गरेको नियमित पत्रकार सम्मेलनमा दिइएको जानकारी अनुसार काठमाडौं उपत्यकालगायत देशका विभिन्न जिल्लामा आज अपरान्हसम्म कोरोना संक्रमितको संख्या १६ हजार ६ सय ४९ पुगेको छ ।

पछिल्लो २४ घण्टामा देशभर १ सय १८ जनामा कोरोना संक्रमण देखिएको मन्त्रालयको भनाई छ । देशको राजधानी काठमाडौंमा पछिल्लो २४ घण्टायता थप २८ जनामा कोरोना संक्रमण देखिएको छ । यस्तै ललितपुरमा १३ र भक्तपुर जिल्लामा थप १ जनामा कोरोना संक्रमण देखिएको छ । कोरोना संक्रमणमा परी हालसम्म देशभर ३५ जनाले ज्यान गुमाएका छन् । यस्तै कोरोना लागेकामध्ये ८ हजार ११ जनाले कोरोनालाई जितेर घर फर्केका छन् ।

पछिल्लो २४ घण्टामा मात्रै १ सय २० जना कोरोनामुक्त भएको मन्त्रालयको भनाई छ । कोरोना संक्रमितमध्ये आठ हजार भन्दा बढी मानिसहरुलाई आइसोलेसनमा राखेर उपचार गरिएको मन्त्रालयले जनाएको छ । नेपालमा जेठ महिनामा भारतबाट नेपाल आउनेहरुको संख्या ह्वात्तै बढेसँगै नेपालमा पनि कोरोना संक्रमण फैलन थालेको हो ।

हाल नेपालले विगतमा जारी गरेको सिमा तथा हवाई उडान (अत्यावश्यकबाहेक) लाई आगामी साउन ७ गतेसम्मका लागि बन्द गर्ने निर्णय गरेको छ ।