गोर्खामा झुण्डिएर आत्महत्याको प्रयास गर्ने एक युवकको उपचारको क्रममा पाटन अस्पतालमा मृत्यु, मृत्युपछि गरिएको परीक्षणमा कोरोना पुष्टि

Best Khabar Team | २०७७ असार २३ गते मंगलबार

०८ जुलाई, २०२०
आरुघाट, गोर्खा । गोर्खा जिल्लामा झुण्डिएर आत्महत्याको प्रयास गर्दैगर्दा गम्भीर अवस्थामा पुगेका एक युवकलाई उपचारका लागि हिजो ललितपुर पठाईकोमा उनको गएराति उपचारका क्रममा मृत्यु भएको छ । ललितपुरस्थित पाटन अस्पतालम उपचारका क्रममा ज्यान गुमाएका ती युवकमा कोरोना संक्रमण पुष्टि भएको पाटन अस्पतालले जनाएको छ ।

गोर्खाको तान्द्राङ्का २६ वर्षका ती युवक हिजो झुण्डिएर आत्महत्याको प्रयास गर्दैगर्दा गम्भीर अबस्थामा भेटिएपछि परिवारले उनलाई उपचारका लागि काठमाडौं पठाएको थियो । जिल्लामा उपचार हुन नसकेपछि उनलाई काठमाडौं पठाईकोमा गएराति उपचारका क्रममा उनको ज्यान गएको थियो । उपचारमा संलग्न चिकित्सकहरुका अनुसार उनको निधन भएपछि गरिएको स्वाब परीक्षणका क्रममा उनमा कोरोना पुष्टि भएको हो ।

गोर्खाको भिमसेन थापा गाउँपालिका वडा नम्बर २ का ती युवक लामो समयदेखि डिप्रेसनमा रहेको र आत्महत्याको प्रयास गरेका थिए । परिवार तथा आफन्तले उनले झुण्डिएको देखेपछि डोरी काटेर उनलाई बचाउनका लागि भन्दै गोर्खाको एउटा अस्पतालमा पठाइएको भएपनि त्यहाँ उपचार सम्भव नभएपछि उनलाई आकस्मिक रुपमा काठमाडौं पठाईएको थियो । उपचारको क्रममा उनको निधन भएको हो । अहिले अस्पतालले उनको शव व्यवस्थापन तथा उनको उपचारमा खटिएका चिकित्सकहरुको स्वाब परीक्षण थालेको छ ।