चीनतर्फबाट सामान ल्याउने गरी ६ महिना पछि एकतर्फी खुल्यो रसुवागढी नाका

Best Khabar Team | २०७७ जेठ २५ गते आइतबार

०६ जुलाई, २०२०
धुन्चे । चीनले केही कन्टेनर सामान ल्याइदिएसँगै विगत ६ महिनादेखि बन्द रहेको नेपाल चीन सीमावर्ती क्षेत्र रसुवाको रसुवागढी नाका आजबाट सञ्चालनमा आएको छ । कोरोना संक्रमण फैलिएपछि चीनले नेपाल भारत सीमावर्ती नाका अनिश्चितकालका लागि बन्द गरिदिएको थियो । तर पछिल्ला दिनहरुमा चीनमा कोरोना संक्रमण एकदमै न्यून बन्दै गएपछि दैनिक उपभोग्य तथा अन्य अत्यावश्यकीय सामानहरु ल्याउनका लागि चीनले एकतर्फी रुपमा रसुवागढी नाका सञ्चालनमा ल्याएको हो ।

यद्यपि नेपालबाट भने मालबाहक गाडीहरु तत्काल चीन प्रवेश गर्न पाउने छैनन् । नेपालमा अहिले पनि कोरोना संक्रमण दैनिक बढ्दो क्रममा रहेका कारण नेपाललाई चाहिने अत्यावश्यक सामग्री तथा अन्य औषधीजन्य सामग्री आयात गर्नका लागि चीनले रसुवागढी नाका एकतर्फीरुपमा सञ्चालनमा ल्याएको हो । यही क्रममा आज चीनबाट आएका केही कन्टेनर सामान रसुवागढी नाकाको नेपाली भूभागतर्फ आइपुगेको छ । सो सामाग्री विशेष गरी स्वास्थ्य सुरक्षासम्बन्धी तथा गार्मेन्टका सामान भएको बताइएको छ ।

यो नाका सञ्चालनमा आएसँगै अब कोरोना नियन्त्रणका लागि आवश्यक पर्ने अत्यावश्यक सामग्री ल्याउनका निजी क्षेत्रलाई समेत बाटो खुलेको छ । तत्कालका लागि चीनबाट मात्रै सामान ल्याउन बाटो खुल्ला हुने छ । तर मानिसहरु आउजाउ गर्न तथा नेपालबाट सामान पठाउनका लागि भने नेपालमा कोरोना पूर्णपमा नियन्त्रणमा आएपछि मात्रै सम्भव हुने चिनियाँ अधिकारीहरुले बताएका छन् ।

Comment from facebook