भारत बन्यो विश्वको तेश्रो कोरोना प्रभावित मुलुक, एकैदिन भेटिए करिब २४ हजार संक्रमित

Best Khabar Team | २०७७ असार २१ गते आइतबार

०५ जुलाई, २०२०
नयाँ दिल्ली । विश्वमा सबैभन्दा बढी कोरोना संक्रमितहरुको सूचीमा भारत तेश्रो नम्बरमा परेको छ । शनिबारसम्म विश्वको तेश्रो बढी कोरोना प्रभावित मुलुकको सूचीमा रसिया रहेको थियो । तर आइतबारसम्म २४ घण्टामा करिब २४ हजार नयाँ कोरोना संक्रमित थपिएसँगै भारत विश्वमा सबैभन्दा धेरै कोरोना संक्रमितको सूचीको तेश्रो नम्बरमा उक्लिएको हो ।

यो समाचार तयार पार्दासम्म भारतमा ६ लाख ९७ हजार ८ सय ३६ जनामा कोरोना संक्रमण देखिएको छ । यस्तै भारतमा हालसम्म कोरोनाका कारण १९ हजार ७ सयको ज्यान गएको छ । कोरोनालाई जितेर ४ लाख २४ हजार ८ सय ९१ जना सामान्य जन जीवनमा फर्किएका छन् । भारतभन्दा अघि अब विश्वमा सबैभन्दा बढी कोरोना संक्रमितको सूचीमा व्राजिल र अमेरिका रहेका छन् । अमेरिकामा यो समाचार तयार पार्दासम्म २९ लाख ६७ हजार ४ सय ९४ जनामा कोरोना संक्रमण देखिएको छ ।

**हिजोसम्म भारत विश्वको चौथो बढी कोरोना संक्रमित मुलुकमा थियो**

यस्तै अमेरिकामा हालसम्म १ लाख ३२ हजार ४ सय ८९ जनाको कोरोनाकै कारण ज्यान गएको छ । हालसम्म १२ लाख ३९ हजार ७२ जनाले कोरोनालाई जितेका छन् । यस्तै विश्वकै सबैभन्दा बढी कोरोना संक्रमितको सूचीको दोश्रो नम्बरमा रहेको ब्राजिलमा हालसम्म १५ लाख ७९ हजार ८ सय ३७ जनामा कोरोना संक्रमण देखिएको छ । ब्राजिलमा हालसम्म ६४ हजार ३ सय ८३ जनाको कोरोनाकै कारण ज्यान गएको छ भने ९ लाख ७८ हजार ६ सय १५ जनाले रोगलाई जितेका छन् ।