काठमाडौं बानेश्वरका एक बृद्धको कोरोना संक्रमणका कारण निधन, संक्रमितको संख्या १५ हजार २ सय नाघ्यो

Best Khabar Team | २०७७ असार १९ गते शुक्रबार

०३ जुलाई, २०२०
काठमाडौं । पछिल्लो २४ घण्टायता काठमाडौंमा एकजना कोरोना संक्रमितको मृत्युसँगै थप ७ सय ४० जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले आज गरेको नियमित पत्रकार सम्मेलनमा दिइएको जानकारी अनुसार काठमाडौं बानेश्वरका एक बृद्दको उपचारको क्रममा निधन भएको हो ।

**स्वास्थ्य मन्त्रालयको नियमित पत्रकार सम्मेलनमा प्रवक्ता जागेश्वर गौतम ।**

उनी नियमित रुपमा रक्तचाप र पार्किन्सनको विरामी रहेका थिए । तर अस्पतालमा उपचारका लागि भर्ना भएका उनमा कोरोना संक्रमण पुष्टि भएको र उपचारकै क्रममा उनको निधन भएको अस्पतालले जनाएको छ । यसैबीच पछिल्लो २४ घण्टामा देशभर ७ सय ४० जनामा कोरोना संक्रमण भएको पुष्टि भएको छ ।

स्वास्थ्य मन्त्रालयले दिएको जानकारी अनुसार देशका विभिन्न जिल्लामा थप ७ सय ४० जनामा कोरोना संक्रमण देखिएको हो । अब योसँगै देशभर कोरोना संक्रमितको संख्या १५ हजार २ सय ५९ पुगेको छ । यही अवधिमा ८ सय २३ जना कोरोना निको भएर घर फर्किएका छन् ।

हालसम्म कुल ६ हजार १ सय ४३ जनाले कोरोना संक्रमणलाई जितेको पनि मन्त्रालयले जनाएको छ । यस्तै काठमाडौंका एक बृद्धको मृत्युसँगै देशभर कोरोना संक्रमणबाट ज्यान गुमाउनेको संख्या ३२ पुगेको छ ।