विश्वमा कोरोना : मृतकको संख्या साढे ४ लाख नाघ्यो, अमेरिकामा मात्रै झण्डै १ लाख २० हजारको मृत्यु

Best Khabar Team | २०७७ असार ४ गते बिहिबार

१८ जुन, २०२०
न्यूर्योक, अमेरिका । विश्वव्यापी महामारीको रुपमा फैलिएको कोरोना भाइरसको संक्रमण (कोभिड १९) बाट हालसम्म विश्वभर ज्यान गुमाउनेको संख्या साढे ४ लाख नाघेको छ । कोरोना भाइरसको संक्रमण, मृतकलगायतको सम्पूर्ण तथ्यांकहरु अद्याबधिक गर्ने ओल्डोमिटर डटकमको पछिल्लो तथ्यांक अनुसार विश्वभर यो समाचार तयार पार्दासम्म कोरोनाका कारण ४ लाख ५१ हजार ८ सय ८ जनाको ज्यान गएको छ ।

यस्तै कोरोना भाइरसका कारण हालसम्म ८४ लाख २५ हजार १ सय ९१ जना संक्रमित बनेका छन् । यस्तै विश्वभरबाट हालसम्म ४४ लाख ३३ हजार ८ सय १ जनाले कोरोनालाई जितेका छन् । कारोनाका कारण हालसम्म सबैभन्दा धेरै प्रभावित देशको सूचीमा अमेरिका रहेको छ । अमेरिकामा हालसम्म कोरोनाका कारण २२ लाख ३४ हजार ८ सय ५४ जना संक्रमित भएका छन् । ती मध्ये १ लाख १९ हजार ९ सय ४३ जनाको मृत्यु भै सकेको छ । अमेरिकामा कोरोना संक्रमणमा परेकामध्ये ९ लाख १८ हजार ७ सय ९६ जना निको भएर घर फर्केका छन् । यस्तै अमेरिकापछि सबैभन्दा धेरै संक्रमितको देशको सूचीमा ब्राजिल परेको छ ।

ब्राजिलमा हालसम्म ९ लाख ६० हजार ३ सय ९ जनामा कोरोना देखिएको छ । कोरोनाका कारण ब्राजिलमा ४६ हजार ६ सय भन्दा बढीले ज्यान गुमाएका छन् । विश्वमा तेश्रो बढी प्रभावित देशको सूचीमा रसिया परेको छ । रसियामा हालसम्म ५ लाख ६१ हजार भन्दा बढीमा कोरोना संक्रमण देखिएको छ । ती मध्ये ७ हजार ६ सय ६० को मृत्यु भै सकेको छ ।

यस्तै भारतमा हालसम्म ३ लाख ६८ हजार ५ सय ५७ जनामा कोरोना संक्रमण देखिएको छ । भारतमा कोरोनाकै कारण १२ हजार २ सय ७४ को ज्यान गएको छ । संक्रमणको हिसावले हेर्दा भारतपछि बेलायत, स्पेन, पेरु, इटली, इरान, जर्मनी र चिली रहेका छन् । नेपाल कोरोना संक्रमित देशको सूचीमा ७० औं नम्बरमा परेको छ ।