आफ्ना २० सैनिक मारिएपछि चीनसँगको आगामी रणनीति तय गर्दै भारत, शुक्रबार सर्वदलीय बैठक आह्वान

Best Khabar Team | २०२६ पुष १७ गते बिहिबार

१७ जुन, २०२०
नयाँदिल्ली । भारत र चीनबीचको सीमावर्ती क्षेत्र लद्दाकमा सोमबार राती चिनियाँ सिमा सुरक्षाबलसँग भएको झडपमा २० भारतीय सैनिकको ज्यान गएपछि भारत सरकारले आकस्मिक रुपमा सर्वदलीय बैठक आह्वान गरेको छ । जुन १९ तारिखका लागि बोलाइएको सर्वदलीय बैठकमा चीन र भारतको सीमावर्ती क्षेत्रमा भएको घटनापछि उत्पन्न परिस्थितिलाई कसरी ह्याण्डिल गर्ने भन्ने विषयमा कुराकानी गर्ने बताइएको छ ।

बैठक भर्चुअल हुने प्रधानमन्त्री कार्यालयले जनाएको छ । सबै दलहरुसँग छलफल गरेर नयाँ रणनीतिमा कसरी अघिबढ्ने भन्ने निर्णय सो बैठकले गर्ने प्रधानमन्त्री नरेन्द्र मोदीले बताएका छन् । अहिले सीमा क्षेत्रमा देखिएको विवाद र त्यसले लिएको हिंश्रकरुपपछि भारत र चीनबीच तनावको स्थित पैदा भएको छ । घटनालाई लिएर आजमात्रै भारतीय विदेशमन्त्री र चिनियाँ विदेशमन्त्रीबीच टेलिफोन वार्तासमेत भएको छ ।

वार्ताका क्रममा आउँदा दिनमा संयमितरुपमा वार्ता र छलफलबाटै समस्याको समाधान खोज्ने सहमति बनेको यहाँका सञ्चारमाध्यमहरुको भनाई छ । पछिल्लो केही साता यता फैलिएको कोरोनाको कहरकैबीच भारत चीनबीच सीमा सुरक्षामा खटिएका चिनियाँ सेनाको आक्रमणमा परी सोमबार राती भारतको लद्दाखमा २० जना भारतीय सैनिकको ज्यान गएको थियो ।

सो घटनामा परी १५ जनाभन्दा बढी सैनिकहरु हराईरहेको भारतीय सञ्चारमाध्यमहरुले जनाएका छन् । तर सो घटनामा परी चिनियाँ पक्षतर्फ कतिको हताहति वा क्षति भयो भन्ने विषयमा चीनले केही बताएको छैन । विगत लामो समयदेखि चीन र भारतबीच लद्दाख क्षेत्रको सीमावर्ती नियन्त्रण रेखाको विषयलाई लिएर विवाद चर्चिएको छ । यो समस्या समाधानका लागि दुबै पक्षले वार्ता र छलफल जारी राखेको भएपनि एक्कासी सोमबार राती विसौं सैनिकको ज्यान जाने गरी सो घटना घटेको हो ।