बंगलादेशबाट २५९ जना नेपालीको उद्दार

Best Khabar Team | २०२६ पुष १७ गते बिहिबार

१४ जुन, २०२०
ढाका, बंगलादेश । बंगलादेशको राजधानी ढाकाबाट २ सय ५९ जना यात्रु लिएर नेपाल बायुसेवा निगमको चार्टर उडान काठमाडौं प्रस्तान गरेको छ । नेपाल बायुसेवा निगमको वाईड बढीको सो विमान यहाँ रोकिएका नेपाली विद्यार्थी तथा अन्य काम विशेषले बंगलादेशमा रहेका नेपालीहरुलाई लिएर काठमाडौंको लागि उडेको हो । नेपालको राष्ट्रिय ध्वजाबाहक नेपाल बायुसेवा निगमको सो विमान कोरोनाका कारण अलपत्र बनेका नेपालीहरुको उद्दारका लागि भन्दै आज बिहान राजधानी ढाका आइपुगेका थियो ।

ढाकामा जम्मा भएका नेपाली विद्यार्थी, कामदार तथा काम विशेषले बंगलादेशका विभिन्न ठाउँमा रोकिएका नेपालीहरुलाई लिएर विमान मध्यान्ह काठमाडौं उडेको हो । चिकित्सक, इन्जिनियरिङ्गलगायतका विभिन्न विषयमा अध्ययनका लागि बंगलादेशमा सयौं नेपालीहरु रहँदै आएका छन् । कोरोनाका कारण गरिएको लकडाउनका कारण उनीहरु नेपाल जान पाएका थिएनन् । यस्तै बंगलादेशलाई कर्मथलो बनाउनेहरु र घुमघामका लागि आएकाहरु पनि लकडाउनका कारण यतै रोकिएका थिए ।

नेपाल सरकारले हालै विश्वका विभिन्न देशमा रहेका नेपालीहरुलाई उद्दार गर्ने योजना सार्वजनिक गरेको थियो । सो योजना अनुसार नेपालमा लकडाउन खुल्ने तयारी हुँदा आज पहिलोपटक विदेशबाट राष्ट्रिय ध्वजाबाहक विमानले नेपालीको उद्दार गरेको हो । ढाकाबाट उडेको विमान नेपालको समय अनुसार दिउँसो करिब ३ बजे काठमाडौं अवतरण गर्ने बताइएको छ ।

उनीहरुलाई शुरुमा काठमाडौंका विभिन्न स्थानमा बनाइएका होल्डिङ्ग सेन्टरमा राखिने र त्यसपछि सम्बन्धित प्रदेशको क्वारेन्टाइनमा पठाउनेगरी तयारी सरकारले गरेको छ । काठमाडौंमा नेपाली सेनाले होल्डिङ्ग सेन्टर र क्वारेन्टाइन व्यवस्थापनको जिम्मा पाएको छ ।