यी १२ सांसद जसले संविधान संशोधन प्रस्तावमाथिको मतदानमा सहभागिता जनाएनन्

Best Khabar Team | २०७७ जेठ ३१ गते शनिबार

१३ जुन, २०२०
काठमाडौं । भारतले अतिक्रमण गरेको नेपाली भूमिसहित तयार भएको नेपालको नयाँ नक्सालाई समावेश गरेर तयार पारिएको नयाँ निसान छाप पारित गर्नका लागि आज प्रतिनिधिसभा भएको मतदानमा केही सांसदहरु अनुपस्थित रहेका थिए ।

नयाँ निसान छाप पारित गर्नका लागि भएको संविधान संशोधन प्रस्तावमाथिको मतदानमा विभिन्न राजनीतिक दलसम्बद्ध १२ जना सांसदहरु अनुपस्थित भएका हुन् । संसद सचिवालय स्रोतले दिएको जानकारी अनुसार प्रतिनिधिसभामा हाल कायम रहेको २ सय ७५ सांसद मध्ये २ सय ५८ जनाले मात्रै संविधान संशोधनको पक्षमा मतदान गरेका थिए ।

सचिवालयका अनुसार संविधान संशोधनको विधेयकमाथि मतदानमा सहभागी नहुने सांसदहरुमा हरिबोल गजुरेल, शिवकुमार मण्डल, प्रमोद शाह, दुरालीदेवी खत्वेनी, धनबहादुर बुढाा, गोपालबहादुर बम, अमृतादेवी अग्रहरी रहेका छन् । यस्तै सूर्यनारायण यादव, सरिताकुमारी गिरी र ज्ञानकुमारी छन्त्याल र सूर्यबहादुर केसीले पनि मतदानमा सहभागीता जनाएनन् ।

यसमध्येमा गिरीले आजको संसद बैठकमा उपस्थिति जनाएको भएपनि बैठक बहिष्कार गर्दै बाहिरिएकी थिइन् । विभिन्न अभियोगमा सांसदहरु रेशम चौधरी, मोहम्मद अफताव आलम र विजयकुमार गच्छदार र हरिनारायण रौनियारको सांसद पद भने अहिले निलम्बनमा परेको छ ।

यी बाहेक अन्य १२ जना सांसद बैठकमा किन अनुपस्थित भए भन्ने विषयमा कुनै जानकारी सार्वजनिक भएको छैन । राष्ट्रिय स्वाधिनताको पक्षमा भएको यो ऐतिहासिक बैठक र मतदान कार्यक्रममा सांसदहरु अनुपस्थित हुनुलाई आम नागरिकले भने अनौठो र दुःखद भएको प्रतिक्रिया दिएका छन् ।