Best Khabar Team | २०२६ पुष १७ गते बिहिबार

---

१३ जुन, २०२०
काठमाडौं । हालै सरकारले जारी गरेको नेपालको नयाँ राजनीतिक नक्सा र निसान छाप संघीय संसद अन्तर्गतको प्रतिनिधिसभाबाट बहुमतले पारित भएको छ । यसअघि सरकारले कालापानी, लिपुलेक र लिम्पियाधुरालगायतका क्षेत्रलाई समेत समेटेर जारी गरेको नयाँ नक्सालाई प्रतिनिधिसभाले पारित गरेको हो । संशोधनको पक्ष र विपक्षमा प्रतिनिधिसभाका सदस्यहरुबीच मतदान भएको थियो । संशोधनको पक्षमा २५८ र विपक्षमा सून्य मत प्राप्त भएको थियो ।

यस्तै पक्ष तथा विपक्षमा मत नहाली तटस्थ रहने भन्नेमा सून्य मत प्राप्त भएको थियो । संविधान संशोधनको प्रस्तावको विपक्षमा संशोधन प्रस्ताव हालेकी सरिता गिरीले भने संसद् बैठक बहिष्कार गरेर निर्वाचन अघि नै नै बाहिरिएकी थिइन् । आजको बैठकमा १७ जना सांसद अनुपस्थित भएका थिए ।

प्रतिनिधिसभामा मत विभाजनको आधारमा संशोधन प्रस्तावमाथि भोटिङ्ग भएको थियो । जस अनुसार प्रस्तावको पक्षमा मत गर्ने, विपक्षमा मत गर्ने तथा पक्ष विपक्षमा मत नगरी तटस्थ बस्ने व्यवस्था गरिएको थियो ।

विगतमा भारतले अतिक्रमण गरेको नेपालको दार्चुला जिल्लामा पर्ने कालापानी, लिपुलेक र लिम्पियाधुरालगायतका क्षेत्रलाई समेत समेटेर केहीदिनअघि सरकारले नयाँ नक्सा सार्वजनिक गरेको थियो । बैठकले संविधानको अनुसूची ३ मा रहेको निसान छापमा राख्नका लागि ल्याइएको विधेयकलाई पनि पारित गरेसँगै अब नयाँ नेपालको नक्सा र निसान छाप प्रचलनमा आउने भएको छ ।

आजको बैठकले नेपालको संविधान (दोस्रो संशोधन) विधेयक, २०७७ लाई सर्वसम्मत रुपमा पारित गरेको हो । आजको प्रतिनिधिसभाको बैठकमा बोल्दै नेताहरुले नयाँ नक्सा जारी गर्ने विषयमा सहयोग गर्ने सबैलाई धन्यावाद दिएका छन् । उनीहरुले भोलिका दिनमा यो विषयमा भारत सरकारसँग वार्तामा बसेर समाधान खोज्नका लागि आग्रह गरेका छन् ।

प्रस्तावमाथि समाजवादी पार्टीका एक सांसदले असन्तुष्टि जनाएको भएपनि समाजवादी पार्टीले पनि संशोधन प्रस्तावमा सहमति जनाएसँगै यो सर्वसम्मतले पारित भएको हो ।

सरकारले गएको जेठ ९ मा संशोधन विधेयक संसदमा दर्ता गरेको थियो । नेपालको राष्ट्रिय एकताको विषय भएको भन्दै सबै राजनीतिक दलहरुले विधेयकलाई सैद्धान्तिक रुपमा सबै दलले स्वीकार गरेका थिए।

---

Comment from facebook