भारत बन्यो विश्वकै चौथो कोरोना प्रभावित मुलुक : एकैदिन झण्डै १० हजार संक्रमित थपिए, मृतकको संख्या ८ हजार नाघ्यो

Best Khabar Team | २०७७ जेठ २९ गते बिहिबार

११ मे, २०२०
नयाँदिल्ली । भारत विश्वमै सबैभन्दा बढी कोरोना प्रभावित देशहरुको सूचीमा चौथो स्थानमा उक्लिएको छ । कोरोनासम्बन्धी विश्वव्यापी तथ्यांक सार्वजनिक गर्ने विभिन्न सूचकांकहरुले उल्लेख गरेको डाटा अनुसार भारत पछिल्लो समयमा बेलायतलाई पछि पार्दै चौथो नम्बरमा उक्लिएको छ । विश्वमा सबैभन्दा बढी कोरोना प्रभावित मुलुकको पहिलो नम्बरको सूचीमा अमेरिका रहेको छ ।

यस्तै सूचीको दोश्रो नम्बरमा ब्राजिल र तेश्रो नम्बरमा रसिया रहेको छ । चौथो स्थानमा बिहीबार भारत उक्लिएको छ । यसअघि बुधबारसम्म यो सूचीमा बेलायत रहेको थियो । भारतका विशेष गरी नयाँदिल्ली, चेन्याई, कानपुर, मुम्बई, हैदराबादलगायतका शहरहरु कोरोनाको कारण नराम्ररी प्रभावित भएका छन् । पछिल्लो २४ घण्टामा भारतमा ९ हजार ८ सय ४६ जना नयाँ संक्रमित थपिएका छन् ।

भारतमा हालसम्म कोरोना भाइरसको संक्रमण २ लाख ९७ हजार जना भन्दा बढीमा फैलिइसकेको छ । कोरोनाकै कारण भारतमा ८ हजार ४ सय ७३ जनाले ज्यान गुमाएका छन् । १ लाख ४६ हजार भन्दा बढीले कोरोनालाई जितेर घर फर्केका छन् । भारतमा विगत २ महिनादेखि जारी लकडाउन खुकुलो पारिएलगत्तै कोरोना संक्रमितहरुको संख्यापनि बढ्न थालेको छ । अहिले भारतले अधिकांश राज्यमा आन्तरिक हवाई सेवा पनि सुचारु गरेको छ ।