धादिङ्गको त्रिपुरासुन्दरी गाउँपालिकामा ७ जनामा कोरोना संक्रमण पुष्टि

Best Khabar Team | २०७७ जेठ २९ गते बिहिबार

११ जुन, २०२०
सल्यानटार, धादिङ्ग । धादिङ्गको त्रिपुरासुन्दरी गाउँपालिका वडा नम्बर ६ मा सात जनामा कोरोना संक्रमण पुष्टि भएको छ । रोजगारीको लागि भारत गएका र हालै भारतबाट फर्केकाहरु गाउँपालिकाले बनाएको क्वारेन्टाइनमा बसेका थिए ।

त्रिपुरासुन्दरी गाउँपालिका वडा नम्बर ६ को सुन्दरी माबि छापथोक तथा नृसिंह आवासीय मावि, दियालिश्वारामा बनाइएको क्वारेन्टाइनमा रहेकाहरुमा कोरोना संक्रमण पुष्टि भएको जिल्ला अस्पताल स्रोतले जानकारी दिएको छ । क्वारेन्टाइनमा रहेकाहरुको आडिटी परिक्षणका क्रममा कोरोना संक्रमण देखिएपछि स्वाबको थप पुष्टिका लागि जिल्ला अस्पताल पठाइएको थियो । जिल्ला अस्पतालले काठमाडौंस्थित केन्द्रीय प्रयोगशालामा पठाएको स्वाबमा कोरोना संक्रमण पुष्टि भएको रिपोर्ट प्राप्त भएको छ ।

उनीहरुमध्ये सातै जना पुरुष रहेको र उनीहरु अहिले क्वारेन्टाइन स्थलमै रहेको बुझिएको छ । यद्यपि स्वास्थ्य मन्त्रालयले यसको औपचारिक पुष्टि भने गरिसकेको छैन । अहिले सल्यानटारबाट स्वास्थ्यकर्मीसहितको प्रहरीे टोली संक्रमितहरुलाई आइसोलेसनमा ल्याउनका लागि आगिञ्चोकतर्फ गएको प्रहरी स्रोतले बताएको छ । योसँगै धादिङ्ग जिल्लामा मात्रै हालसम्म कोरोना संक्रमितको संख्या ३० पुगेको छ ।

Comment from facebook