भारतबाट फर्केका धादिङ्गका १६ जनामा कोरोना संक्रमण

Best Khabar Team | २०७७ श्रावण २२ गते बिहिबार

०८ जुन, २०२०
धादिङ्गबेसी । धादिङ्गमा हालै भारतबाट फर्केका १६ जनामा कोरोना संक्रमण देखिएको छ । जिल्लाका विभिन्न भागमा घर भै रोजगारीका लागि भारत गएका उनीहरु गएको जेठ दोश्रो साता भारतबाट फर्केर जिल्ला सदरमुकाम धादिङ्गबेसीको क्वारेन्टाइनमा बस्दै आएका थिए । जिल्ला अस्पताल धादिङ्गले दिएको जानकारी अनुसार संक्रमित सबैको अवस्था सामान्य रहेको छ ।

उनीहरुलाई अहिले जिल्ला अस्पतालको आइसोलेसनमा राखेर उपचार थालिएको छ । यो सँगै धादिङमा कोरोना संक्रमितको संख्या २२ जना पुगेको छ । यसअघि संक्रमण देखिएका ६ जनामध्ये ३ जनाको उपचार चलिरहेको छ भने ३ जना उपचारपछि घर फर्केका छन् । धादिङ्गमा एकैपटक यति धेरैसँख्यामा कोरोना संक्रमित भेटिएको यो पहिलो पटक हो ।

हाल संक्रमण देखिएकाहरु सदरमुकाम धादिङ्गबेसीमा रहेको नीलकण्ठ उच्चमाविको क्वारेन्टिनमा बस्दै आएहरु रहेका छन् । उनीहरुको स्वाब परीक्षणका लागि जेठ २४ गते मकवानपुरको हेटौंडामा रहेको किटजन्य रोग अनुसन्धान तथा तालिम केन्द्र पठाइएको थियो । तर आज बिहान प्राप्त रिपोर्ट मध्ये १६ जनामा कोरोना संक्रमण पुष्टि भएको जिल्ला अस्पतालले जनाएको छ ।