डोल्पामा कोरोनाबाट एक पुरुषको मृत्यु : शवको अन्तेष्टि गरिएको ३ दिनपछि कोरोना पुष्टि

Best Khabar Team | २०७७ जेठ २४ गते शनिबार

०६ जुन, २०२०
दुनै, डोल्पा । डोल्पामा कोरोनाबाट थप एकजनाको ज्यान गएको छ । जिल्लाको जगदुल्ला गाउँपालिका वडा नम्बर ३ का ५८ वर्षका एक पुरुषको कोरोनाबाट ज्यान गएको पुष्टि कर्णाली स्वास्थ्य विज्ञान प्रतिष्ठानले गरेको छ । योसँगै नेपालमा कोरोनाबाट ज्यान गुमाउनेको संख्या १२ पुगेको छ । अचम्मको कुरा के छ भने कोरोनाको आशंका क्वारेन्टाइनमा बसेका ती पुरुष क्वारेन्टाइनबाट घर आएर घरमै बसेको अवस्थामा उनको मृत्यु भएको थियो ।

मृत्यु भएको ३ दिनपछि मात्रै उनमा कोरोना पुष्टि भएको छ । जबकी उनको ३ दिनअघि नै अन्तेष्टि सम्पन्न भै सकेको छ । विकट हिमाली जिल्ला डोल्पाको जगदुल्ला गाउँपालिकाका ती पुरुष क्वारेन्टाइनबाट घर फर्केको केही समयपछि मृत्युबरण गर्न पुगेका थिए । मृत्यु भएपछि गरिएको स्वाब परीक्षणमा उनमा कोरोना पुष्टि भएको प्रतिष्ठानको भनाई छ । सुर्खेतको क्वारेन्टाइनमा बस्ने उनी जेठ १६ गते घरमा गएको र घरमै रहेका बेला उनको जेठ २० गते ज्यान गएको बताइएको छ ।

दमको विरामी उनको सोही दिन नै स्वाब निकालेर अन्तेष्टि गरिएको थियो । स्वाबको रिपोर्ट हिजो साँझ मात्रै आएको र उनमा कोरोना पुष्टि भएको प्रतिष्ठानले जारी गरेको विज्ञप्तिमा छ । उनको मृत्यु भएपछि उनका सम्पर्कमा रहेका अन्य स्थानीय तथा परिवारको स्वाब परीक्षण थलिएको बताइएको छ ।