दाङ्गमा उद्योग बाणिज्य संघको एम्बुलेन्सबाट ‘ब्राउन सुगर’ तस्करी, एक युवतीसहित ३ पक्राउ

Best Khabar Team | २०७७ जेठ २३ गते शुक्रबार

०५ जुन, २०२०
घोराही, दाङ्ग । त्यसो त सामान्य अर्थमा सोच्दा एम्बुलेन्स भनेको बिरामीको उपचारका लागि प्रयोग गरिने आकस्मिक सेवाको सवारी साधन हो । विरामी वा दुर्घटनामा घाइते भएकाहरुलाई छिटो भन्दा छिटो उपचारका लागि अस्पताल वा स्वास्थ्य संस्थामा पु-याउने सवारी साधनको रुपमा एम्बुलेन्सलाई लिने गरिन्छ । तर यहाँ देशका चर्चित उद्योगी व्यवसायीहरुको छाता संगठनले सञ्चालनमा ल्याएको एम्बुलेन्सले गैरकानुनी र कानुद्वारा बर्जित काम गरिरहेका छन् । जनतको सेवा गर्नका लागि भन्दै सरकारले एम्बुलेन्सको आयकर समेत छुट गर्ने गरेको भएपनि यहाँको एक एम्बुलेन्सले भने सरकारले प्रतिबन्ध लगाएको लागूऔषध ओसार पसार गर्ने गरेको तथ्य खुलेको छ ।

जिल्ला प्रहरी कार्यालयले दिएको जानकारी अनुसार उद्योग वाणिज्य संघ तुलसीपुले सञ्चालनमा ल्याएको एउटा एम्बुलेन्सबाट कानुनद्वारा बर्जित अबैध लागूऔषध ब्राउन सुगर समेत प्रहरीले आज ३ जनालाई पक्राउ गरेको छ । प्रहरीले दिएको जानकारी अनुसार रा१च ३८९ नम्बरको एम्बुलेन्समा राखेर तस्करी गरिँदै गरेको अवस्थामा अबैध लागूऔषध, एम्बुलेन्सका चालकसहित ३ जनालाई प्रहरीले नियन्त्रणमा लिएको हो । कोहलपुरबाट तुल्सीपुर आउँदै गरेको सो एम्बुलेन्सले अबैध लागूऔषध बोकेको जानकारी प्राप्त भएपछि प्रहरीले तुलसीपुरको दमारगाउँबाट सो एम्बुलेन्सलाई नियन्त्रणमा लिएर खानतलासी लिएको थियो ।

कोहलपुरबाट नक्कली विरामी र ब्राउनसुगर लिएर तुलसीपुर आउँदै गर्दा पक्राउ पर्नेमा जिल्लाको दंगीशरण गाउँपालिका वडा नम्बर ६का एम्बुलेन्स चालक तिलक विश्वकर्मासहित घोराहीका शंकर पुन र तुलसीपुरकी दिपा थापा रहेकी छिन् ।

प्रहरीले उनीहरुको साथबाट १६ ग्राम ४५० मिलिग्राम ब्राउनसुगर समातेको छ । प्रहरीले एम्बुलेन्ससहित तीनैजनालाई नियन्त्रणमा लिएर जिल्ला प्रहरी कार्यालय बुझाएको छ । जिल्ला प्रहरी कार्यालयले अनुसन्धानका लागि उनीहरुलाई नियन्त्रणमा लिएको जनाएको छ ।