बुटबलका व्यवसायीको नयाँ योजना : भारतमा रोजगारी गुमाएका दक्ष नेपाली कामदारलाई रोजगारी दिने घोषणा

Best Khabar Team | २०७७ जेठ २२ गते बिहिबार

०४ जुन, २०२०
गोलपार्क, बुटबल । यतिबेला कोरोना भाइरसका संक्रमणका कारण विश्वभरको अर्थतन्त्र नराम्ररी खुम्चनु परेको छ । छिमेकी मुलुक भारत र नेपाल पनि यसको चपेटाबाट अछुतो रहन सकेका छैनन् । भारतमा कोरोना संक्रमणलाई मध्जनजर गर्दै जारी गरिएको लकडाउन लम्बँदै गर्दा लाखौं मजदुरले रोजगारी गुमाएका छन् । त्यसमा केही हजार हिस्सा नेपाली मजदुरको पनि छ । भारतमा रोजगारीका लागि गएका हजारौं मजदुरहरु यतिबेला जोखिम मोलेर नेपाल फर्किरहेका छन् । उनीहरु दोहोरो जोखिममा छन् ।

एक त उनीहरुले वर्षौदेखि खाईपाई आएको रोजगारी गुमाएका छन् भने अर्कोतर्फ कोरोनाको जोखिमसँगै लिएर आएका छन् । रोजगारी नखोसिएका मजदुरहरु अझै केही महिना आफ्नो काममा फर्कनका लागि भारत जान सक्ने अवस्थामा छैनन् । यता नेपालमा रोजगारीका लागि आएका हजारौं भारतीयहरुले पनि अहिले कोरोनाका कारण जागिर गुमाएर वा बाध्यताबस भारत फर्कनुपर्ने अवस्था सिर्जना भएको छ । कोरोना र लकडाउनपछि हजारौंको संख्यामा भारतीय नागरिकहरु नेपाल छाडेर भारत गएका छन् । मजदुहरु मात्रै होइनन् उद्योगी तथा व्यवसायीहरु पनि लकडाउनको मारमा परेका छन् ।

तर यसबीचमा बुटवलका केही उद्योगी व्यवसायीले भने नयाँ सोच र अवधारणा अघि सारेका छन् । जुन देशका अन्य क्षेत्रका उद्योगी व्यवसायीले पनि अनुशरण गर्न सकेको खण्डमा लाखौ नेपालीलाई नेपालभित्रै रोजगारी दिन सकिने अवस्थ सिर्जना हुने देखिन्छ । यसको फाइदा धेरै छ । एक त नेपाली कामदारले कामकै लागि विदेसिनुपर्ने अवस्था आउँदैन भने अर्को व्यवसायीहरुले पनि महँगो मूल्य तिरेर भारतबाट कामदार नेपाल ल्याउनुपर्ने बाध्यता हुँदैन । नेपालमा कमाएको रकम नेपालमै खर्च हुन्छ । यसले अर्थतन्त्र उकास्न पनि ठूलो भूमिका खेल्दछ । अब लाखौं प्रस्तुत सामग्रीको मुख्य विषयतर्फ ।

रुपन्देहीको देवदहमा रहेको ‘सनब्रिक्स नामक इँटा उद्योग’ र बुटबलको मिलनचोकमा रहेको ‘ओको’ फर्निचरले भारतमा रोजगारी गुमाएर नेपाल फर्किएका दक्ष तथा अर्धदक्ष मजुरहरुलाई रोजगारी दिने घोषणा गरेका छन् । अदक्षलाई सीप सिकाउने एवं अर्धदक्ष तथा दक्ष मजदुरलाई सिधै रोजगारीका लागि प्रस्ताव गरिएको इँटा तथा र फर्निचर उद्योगका सञ्चालकको भनाई छ । ओको फर्निचरका प्रवन्ध निर्देशक बासुदेव श्रेष्ठले अहिलेको अवस्थामा रोजगारी गुमाएर फर्केका मजदुरको अवस्था कठिन भएको भन्दै उनीहरुलाई स्वदेशमै रोजगारीको अवसर दिन यस्तो व्यवस्था गर्न लागिएको बताए ।

कम्पनीसम्बद्ध व्यक्तिले सामाजिक सञ्जालमा राखेको सूचना ।

उनले आफ्नो फर्निचर उद्योगमा लकडाउन अघिसम्म दैनिक एकदर्जन भारतीय मिस्त्री तथा हेल्परले काम गरिरहेको र उनीहरुले दैनिक १ हजार देखि १९ सयसम्म पारिश्रमिक बुझ्ने गरेको बताए । तर नेपालकै दक्ष व्यक्तिलाई काम दिन सकिएको अवस्थामा एक त नेपाली कामदारले स्वदेशमै काम गर्न पाउने र अर्को उसको सीपको समेत उचित सम्मान हुने सोचले यो योजना अघि सारिएको बताए । यस्तै रुपन्देहीको देबदहमा रहेको सनब्रिक ईँटा उद्योगले पनि लकडाउन अघिसम्म करिब ७० जना भारतीय र ३० जना नेपाली गरी करिब १ सय कामदारलाई रोजगारी दिँदै आएको थियो । लकडाउनका कारण अहिले उद्योग बन्द अवस्थामा रहेकोले सबै भारतीय कामदार स्वदेश फर्केका छन् ।

अब लकडाउन खुकुलो भएपछि भारतमा रोजगारी गुमाएर नेपाल फर्केका र इटाँ उद्योगमा काम गर्न चाहने नेपाली मजदुरका लागि अवसर दिन सकिने उद्योगको भनाई छ । उद्योगका राजन सेन्चुरीले नेपाली कामदारप्रति सम्मान व्यक्त गर्न र स्वदेशमै रोजगारीको अवसर सिर्जना गर्न सरकारले लिएको लक्ष्यमा सेवा पु-याउने प्रयास स्वरुप स्वदेशी कामदारलाई अवसर दिन लागिएको बताए । आफूहरुले जस्तै देशका हरेक क्षेत्रका उद्योग र व्यवसायीहरुले सकेसम्म स्वदेशी कामदारलाई नै काम दिन सकेको खण्डमा कोरोनाले निम्ताएको बेरोजगारीको समस्या धेरैहदसम्म समाधान हुने श्रेष्ठ र सेन्चुरीको भनाई छ । दुबै कम्पनीले सामाजिक सञ्जालमार्फत् यस्ता दक्ष तथा अर्धदक्ष मजदुरले सम्पर्क गर्न सकिने बताएका छन् ।