चरित्र अभिनेता ठकुरीको निधन

Best Khabar Team | २०२६ पुष १७ गते बिहिबार

३१ मे, २०२०
काठमाडौं । कलाकार जयनन्द चन्द ठकुरी आज ब्रह्मलीन भएका छन् । विभिन्न खाले दीर्घ रोगबाट पीडित ठकुरीको आज बिहान साढे ११ बजे ललितपुरको बागडोलस्थित आफ्नै निवासमा निधन भएको हो । पछिल्ला केही वर्षदेखि कलाकार ठकुरी मधुमेह, उच्चरक्तचापलगायतका रोगबाट पीडित थिए । यस्तै केहीवर्षदेखि उनमा पक्षघातको समस्या रहेको थियो ।

‘जीवन रेखा’ नामक नेपाली चलचित्रबाट अभिनय क्षेत्रमा प्रवेश गरेका ठकुरीले नेपालका दर्जनौं चलचित्रमा अभिनय गरेका छन् । विश्वास, भाग्य रेखा, फेरि भेटौँला, मायालु, युद्धलगायतका थुप्रै चलचित्रमा चरित्र अभिनेताको भूमिका निर्वाह गरेका चन्दले भारतीय चलचित्र पञ्चओटी तथा पाकिस्तानी एक चलचित्रमा समेत अभिनय गरेका छन् । उनले केही नेपाली नाटक र टेलिफिल्म तथा म्युजिक भिडियोहरुमा पनि अभिनय गरेका छन् । उनले अभिनय गरेको पछिल्लो चलचित्र ‘भागिभागी नजाउ’ हो ।

पछिल्लो समय उनको परिवारले उनको उपचारको लागि आर्थिक अभाव झेल्दै आएको थियो ।एक छोरीका बाबु चन्द आफ्नी श्रीमतीका साथ ललितपुरको बागडोलमा बस्दै आएका थिए । ८० वर्षको उमेर आज ब्रह्मलीन भएका ठकुरीको आजै पशुपति आर्यघाटमा अन्त्येष्टि गरिएको छ ।