दैलेखमा १० दिनअघि भारतबाट फर्केर क्वारेन्टाइनमा बसेका एक युवकको मृत्यु, कोरोनाको आशंका

Best Khabar Team | २०७७ जेठ १७ गते शनिबार

३० मे, २०२०
दुल्लु, दैलेख । भारतबाट फर्किएर क्वारेन्टाइनमा बस्दै आएका एक युवकको आज दिउँसो ध्यान गएको छ । जिल्लाको दुल्लु नगरपालिकाले निर्माण गरेको क्वारेन्टाइनमा बस्दै आएका दुल्लु नपा ११ का ३५ वर्षका युवकको आज दिउँसो एक्कासी लडेको र त्यसको केही समयपछि नै ज्यान गएको प्रत्यक्षदर्शीहरुले बताएका छन् ।

जुल्लास्थित कर्णाली स्वास्थ्य विज्ञान प्रतिष्ठानमा गरिएको स्वाब परीक्षणका क्रममा उनका कोरोना संक्रमण पुष्टि भएको जिल्ला जनस्वास्थ्य कार्यालयले जनाएको छ । तर स्वास्थ्य मन्त्रालयले भने यो समाचार तयार पार्दासम्म यसको औपचारिक पुष्टि गरेको छैन । रोजगारीका लागि भारत गएका उनी १० दिनअघि जिल्ला फर्केर क्वारेन्टाइनमा बस्दै आएका थिए । आज बिहान क्वारेन्टाइनमा रहेकै बेला चिया खाएर यताउता हिँड्न लाग्दा एक्कासी लडेको र त्यसको केही बेरेमै उनको मृत्यु भएको बताइएको छ ।

दुल्लु नगरपालिकाले पनि उनको मृत्यु भएको पुष्टि गर्दै कोरोनाकै कारण उनको मृत्यु भएको जनाएको छ । यद्यपि उनमा कोरोनासँग मिल्दोजुल्दो कुनै लक्षण भने नदेखिएको बताइएको छ । नेपालमा हालसम्म कोरोनाका कारण ६ जनाको मृत्यु भएको पुष्टि स्वास्थ्य मन्त्रालयले गरेको छ । यस्तै देशभर १ हजार ४ सय २ जनामा कोरोना देखिएको छ ।

Comment from facebook