काठमाडौंको टिचिङ् अस्पतालस्थित मनमोहन कार्डियो सेन्टरमा उपचाररत महिलामा कोरोना संक्रमण

Best Khabar Team | २०२६ पुष १७ गते बिहिबार

२३ मे, २०२०
काठमाडौं । काठमाडौंको शिक्षण अस्पतालमा उपचाररत मकवानपुरकी एक महिलामा कोरोना संक्रमण पुष्टि भएको छ । स्वास्थ्य मन्त्रालयले दिएको जानकारी अनुसार मुटुसम्बन्धी रोगबाट पीडित भै शिक्षण अस्पताल (टिचिङ्ग हस्पिटल) अन्र्तगत रहेको मनमोहन कार्डियो थोरासिक भास्कुलर एण्ड ट्रान्सप्लान्ट सेन्टरमा उपचाररत ती महिलामा गएराति कोरोना संक्रमण पुष्टि भएको हो ।

संक्रमित महिलाको स्थानी घर मकवानपुर जिल्लाको हेटौंडा उपमहानगरपालिका वडा नम्बर ४ हुप्रचौर रहेको बताइएको छ । उनी एकसाता अघि मुटुसम्बन्धी समस्याको उपचारका लागि उनी सेन्टरमा भर्ना भएकी थिइन् । ५४ वर्षकी ती महिलामा कोरोनासँग मिल्दोजुल्दो लक्षण देखिएपछि चिकित्सकहरुले उनको स्वाब संकलन गरी टेकुस्थित राष्ट्रिय प्रयोगशालामा पठाएका थिए । प्रयोगशालाले उनीमा कोरोना भएको पुष्टि गरेको छ ।

उनको अवस्था केही जटिल रहेको अस्पतालले जनाएको छ । हाल उनलाई शिक्षण अस्पतालकै हातामा रहेको गणेशमान भवनमा रहेको आइसोलेसन सेन्टरमा राखेर उपचार थालिएको अस्पतालले जनाएको छ । केहीसमयअघि उनमा स्वाव प्रश्वाससम्बन्धी समस्या देखिएको थियो । त्यसपछि हेटौंडा अस्पतालले थप उपचारका लागि भन्दै एकसाता अघि उनलाई काठमाडौं रिफर गरेको थियो । हाल उनको उपचारमा खटिएका चिकित्सकहरुको समेत स्वाब परीक्षण गरी उनीहरुलाई क्वारेन्टाइनमा राखिएको बताइएको छ ।