Best Khabar Team | २०७७ जेठ ७ गते बुधबार

---

२० मे, २०२०
काठमाडौं । नेपाल सरकारद्वारा आज जारी भएको नेपालको नयाँ राजनीतिक तथा प्रशासनिक नक्सालाई भारतले स्वीकार्न नसकिने बताएको छ । नेपाल सरकारले भारतले विगतमा हड्पेको लिम्पियाधुरा, कालापानीलगायतका क्षेत्रको भूमिसमेतलाई समावेश गरेर नयाँ नक्सा सार्वजनिक गरेको केहीघण्टा वित्न नपाउँदै भारतले औपचारिक रुपमा यस्तो प्रतिक्रिया दिएको हो ।

भारतीय विदेश मन्त्रालयले नेपालले भारतसँग छलफल नगरी जारी गरेको नक्सालाई स्वीकार्न नसकिने भन्दै यसको समाधान कुटनीतिक ढंगबाट खोज्नुपर्ने बताएको छ । नेपालले ऐतिहासिक तथ्य प्रमाणलाई आधार मानेर नयाँ नक्सा सार्वजनिक गरेको बताइरहेका बेला भारतीय विदेश मन्त्रालयका प्रवक्ता अनुराग श्रीवास्तवले यसको खण्डन गर्दै यसमा सत्यता नभएको दाबी गरेका छन् । उनले नेपालले जारी गरेको नयाँ नक्सामा भारतीय भूमि समावेश गराईएको आरोप लगाए । वार्ताको माध्यमबाट सिमा विवाद समाधानका लागि पहल गर्नका लागि नेपाल सरकारलाई आग्रह समेत गरेका छन् ।

प्रवक्ता अनुरागले अहिले नेपालले जारी गरेको नक्सालाई कृतिम दाबीको संज्ञा दिएका छन् । उनले सार्वभौमसत्ता र भौगोलिक अखण्डताको सम्मान गर्नका लागि नेपाललाई आग्रह समेत गरेका छन् । नेपालको भारतले अतिक्रमण गरी बाटो निर्माण गरेको लिम्पियाधुरा, कालापानी तथा लिपुलेक क्षेत्रलाई समावेश गरी नयाँ नक्सा सार्वजनिक गरेपछि भारतले यस्तो प्रतिक्रिया दिएको हो ।

---

Comment from facebook