काठमाडौं उपत्यकामा ५ सहित देशभर थपिए २७ संक्रमित, कुल संक्रमितको संख्या ४०२ पुग्यो, ३६ जिल्ला प्रभावित

Best Khabar Team | २०२६ पुष १७ गते बिहिबार

१९ मे, २०२०
काठमाडौं । काठमाडौं उपत्यका भित्र रहेका काठमाडौं, ललितपुर र भक्तपुरमा ५ जनासहित देशका विभिन्न जिल्लामा २७ जना कोरोना संक्रमित थपिएका छन् । स्वास्थ्य मन्त्रालयले दिएको जानकारी अनुसार काठमाडौंमा ३ जना, ललितपुर र भक्तपुरमा एक एक जनामा कोरोना संक्रमण पुष्टि भएको हो ।

मन्त्रालयले आज गरेको नियमित पत्रकार सम्मेलनमा दिइएको जानकारी अनुसार उनीहरुको सम्कर्पमा रहेकाहरुको बारेमा स्वास्थ्यकर्मीहरुले जानकारी लिने काम अघि बढाएका छन् । यस्तै उपत्यका बाहिर झापामा ९, मोरङमा १, सुनसरीमा १, सर्लाहीमा २, मकवानपुरमा १, रामेछाप १, सिन्धुली १, लमजुङ १, नवलपरासी १ र कपिलवस्तुमा ४ जना नयाँ कोरोना संक्रमित थपिएका हुन्। अब देशका ३६ जिल्लामा कोरोना संक्रमण देखिएको मन्त्रालयले जनाएको छ ।

संक्रमितहरु सबैको अवस्था सामान्य रहेको बताइएको छ । हालसम्म कोरोनाका कारण देशभर ४ सय २ जना संक्रमित भएका छन् । ती मध्ये ३७ जना उपचारपछि घर फर्केका छन् भने २ जनाको मृत्यु भएको छ । सरकारले कोरोना नियन्त्रणका लागि भन्दै आगामी जेठ २० गतेसम्मका लागि देशभर लकडाउनको घोषणा गरेको छ ।