धादिङ् र गुल्मीका समेत गरी थप ५३ जनामा कोरोना, संक्रमित हुनेको संख्या ३५७

Best Khabar Team | २०७७ जेठ ५ गते सोमबार

१८ मे, २०२०
काठमाडौं । गुल्मी र धादिङ् जिल्लाका समेत गरी देशभर थप ५३ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयले दिएको जानकारी अनुसार बाँकेमा १ महिला र ४६ पुरुष गरी ४७ जनामा कोरोना संक्रमण देखिएको हो । भेरी अञ्चल अस्पतालमा गरिएको स्वाब परीक्षणमा उनीहरुमा कोरोना संक्रमण पुष्टि भएको हो ।

यस्तै धादिङ्, धनुषा, दाङ्ग र रौतहटका एक एक जनामा पनि कोरोना संक्रमण पुष्टि भएको छ । उनीहरुको स्वाब काभ्रेको धुलिखेल अस्पतालमा परीक्षणमा गरिएको थियो । यसैगरी मोरङ्गको विराटनगरमा गरिएको परीक्षणमा मोरङ्गका एक जनामा कोरोना संक्रमण पुष्टि भएको छ । संक्रमित सबैको अवस्था सामान्य रहेको र उनीहरु चिकित्सकको निगरानीमा रहेको मन्त्रालयको भनाई छ ।

मन्त्रालयले यसअघि जारी गरेको बुलेटिनमा रौतहट र बारामा गरी थप ९ जनामा कोरोना संक्रमण भएको पुष्टि गरेको थियो । यी नौ जनासहित आज एकैदिन ६२ जनामा कोरोना संक्रमण पुष्टि भएको छ । संक्रमितमध्ये २ जनाको ज्यान गै सकेको छ भने ३६ जना उपचारपछि घर फर्केका छन् । यो सँगै देशभर कोरोना संक्रमित हुनेको संख्या ३ सय ५७ पुगेको छ ।