‘काठमाण्डौं भ्याली’मा लकडाउन कडा पारियो, सडक गल्लीमा निस्के पक्राउ गरिने, हिँडेर समेत काठमाडौं आउन नपाईने

Best Khabar Team | २०७७ जेठ २ गते शुक्रबार

१५ मे, २०२०
काठमाडौं । कोरोना (कोभिड१९) को संक्रमणको जोखिम बढेपछि सरकारले काठमाडौं उपत्यकामा लकडाउनलाई थप कडा बनाउने निर्णय गरेको छ । गृहमन्त्रालयले सरोकारवालाहरुसँगको छलफलपछि लकडाउनलाई प्रभावकारी बनाउन विभिन्न खाले व्यवस्था गर्न लागेको हो । यस क्रममा पैदलयात्रा गरेर विभिन्न नाकाहुँदै काठमाडौं छिर्नेहरुलाई पूर्णरुपमा रोक लगाइने भएको छ । यसरी आउनेहरुलाई जहाँबाट आएको हो त्यतै फर्काइने भएको छ ।

काठमाडौंका सडक तथा गल्लीमा मानिसहरुको भीड बढ्दै गएको ठहरसहित गृहमन्त्रालयले यसरी सडक तथा गल्लीमा अनावश्यकरुपमा निस्कनेहरुलाई पक्राउ गर्न प्रहरीलाई निर्देशन दिएको हो । लकडाउनलाई प्रभावकारी बनाउन र जोखिम फैलन नदिन आम नागरिकले सरकारले दिएको निर्देशनलाई अक्षरस पालना गर्नका लागि सरकारले सबैमा अनुरोध समेत गरेको छ ।

यस्तै अत्यावश्यक सेवामा रहेका सवारी साधन तथा व्यक्तिहरुलाई भने आवश्यक समन्वय गरेर मात्रै छाडिने भएको छ । सरकारले आजैदेखि लागूहुने गरी जिल्लाले जारी गरेको सवारी पास सबै रद्द भएको घोषणा समेत गरिसकेको छ । आम नागरिकलाई आवश्यक पर्ने अत्यावश्यकीय सामग्री बोकेका मालबहाक सवारी साधन तथा एम्बुलेन्स, शवबाहान, दमकललगायतलाई भने निर्वाध रुपमा सञ्चालन हुन दिने निर्णय गरेको छ ।

प्रेस तथा अन्य अत्यावश्यक सेवा प्रवाहमा रहेकाहरुलाई पनि उनीहरुको आधिकारिक परिचयपत्र तथा नियमक निकायले जारी गरेको कार्डको आधारमा काममा जान दिने निर्णय सरकारले गरेको छ । सरकारले यसअघि एउटा जिल्लाबाट अर्को जिल्लामा जाने यात्रु तथा सवारीमा रोक लगाईसकेको छ ।

Comment from facebook