चौतर्फी दबाबपछि कालापानी क्षेत्रमा सशस्त्र प्रहरी पोस्ट स्थापना

Best Khabar Team | २०७७ बैशाख ३१ गते बुधबार

१३ मे, २०२०
खलंगा । भारतले नेपालीको सिमावर्ती क्षेत्र दार्चुलामा नेपाली भूभागहुँदै मानसरोबर जाने बाटो खोलेलगत्तै उत्पन्न चौतर्फी दबाबपछि सरकारले सो क्षेत्रमा सशस्त्र प्रहरीको बाहिरी सीमा सुरक्षा चौकी स्थापना गरेको छ । २५ जना सशस्त्र प्रहरी रहने सो पोस्टको नेतृत्व सशस्त्र प्रहरीका निरीक्षक लिलीबहादुर चन्दले गरेका छन् ।

दार्चुलाको सदरमुकाम खलंगामा रहेको सशस्त्र प्रहरीको ५० नम्बर गुल्म हेडकार्वटरका निरीक्षक चन्दको नेतृत्वमा रहेको सो प्रहरी पोष्टले सिमा सुरक्षा गर्ने बताइएको छ । पोष्टमा खटिएका सुरक्षाकर्मीका लागि भन्दै सरकारले आजै हेलिकोप्टबाट बन्दोबस्तीका सामान समेत सो क्षेत्रमा पठाएको थियो । सोही क्षेत्रमा नेपाल प्रहरीको ८ जनाको टोलीले पनि सितापुल भन्ने स्थानमा प्रहरी चौकी स्थापना गर्ने तयारी गरेको छ ।

**तस्वीर सौजन्य: गृहमन्त्रीका प्रेस सल्लाहकार किरण भट्टराई ।**

तीब्बतमा अवस्थित चर्चित कैलाश मानसरोबर जानका लागि भारतले कच्ची सडकमार्ग सञ्चालनमा ल्याए सिमा विवाद तीव्र बनेको छ । संसददेखि सडकसम्म सरकारको विरोधमा प्रदर्शन भै रहेका छन् । विगतदेखि नै भारतीय पक्षले सो क्षेत्रमा रहेको सयौं हेक्टर नेपालको जमिन आफ्नो पकडमा लिएर एकतर्फी ढंगले संरचना बनाउँदै आएपनि त्यो फिर्ता ल्याउन सरकारले त्यसमा कुनै प्रभावकारी कदम चालेको छैन ।