३९ जना संक्रमित भेटिएपछि पर्सामा ६ दिने कर्फ्युको घोषणा

Best Khabar Team | २०७७ बैशाख ३० गते मंगलबार

१२ मे, २०२०
वीरगञ्ज । जिल्ला प्रशासन कार्यालय पर्साले कोरोना रोगको संक्रमण फैलन नदिन जिल्लाभर ६ दिन लामो कर्फ्यु (निषेधाज्ञा) को घोषणा गरेको छ । स्थानीय प्रशासनले आज साँझ ८ बजेदेखि लागू भएको कर्फ्यु आगामी जेठ ५ गते राति १२ बजेसम्म जारी रहने जनाएको छ । कोरोनाको संक्रमण फैलन नदिनका लागि कर्फ्यु आदेश जारी गरिएको भन्दै यसलाई अक्षरशः पालना गर्न सबैमा अपिल गरेको छ ।

कर्फ्युको समयमा विरामी परेर अस्पताल जाने वा अति नै आवश्यकीय काममा नजिकको प्रहरी कार्यालय वा प्रशासनको अनुमति बाहेक अन्यलाई घरभित्रै बस्न भनिएको छ । अन्यथा कडा कारबाही गरिने बताएको छ ।कर्फ्युको समयमा पनि अत्यावश्यक सेवा प्रवाहमा जुटेका सवारी साधन सञ्चालनमा रोक लगाईने छैन । जसमा एम्बुलेन्स, बारुणयन्त्र, सञ्चारकर्मीको गाडी, शव बहानलगायत रहेका छन् ।

पर्सामा हालसम्म ३९ जनामा कोरोना संक्रमण देखिएपछि स्थानीय प्रशासनले सिँगो जिल्लालाई सिल गरी कर्फ्युको घोषणा गरेको हो । ३९ जना संक्रमितमध्ये २ जना सञ्चारकर्मी र एकजना नर्स समेत रहेको बताइएको छ । कर्फ्युको समयमा जिल्लाभर सेना परिचालन गरिने स्थानीय प्रशासनको भनाई छ ।