पूर्वप्रधानमन्त्री डा. बाबुराम भट्टराई विरुद्ध साइबर अपराधको उजुरी

Best Khabar Team | २०७७ बैशाख २६ गते शुक्रबार

०८ मे, २०२०
काठमाडौं । पूर्वप्रधानमन्त्री डा. बाबुराम भट्टराईसहित ३ जना विरुद्ध आज काठमाडौं प्रहरीमा साईबर अपराधको अभियोगमा उजुरी दर्ता भएको छ । पूर्व प्रहरी महानिरीक्षक सर्वेन्द्र खनाल, सांसदद्वय महेश बस्नेत र किसान श्रेष्ठले डा भट्टराई र उनका सहयोगी विश्वदिप पाण्डे, समाजवादी पार्टीका नेता सुरेश यादवलगायतविरुद्ध आज साइबर अपराधको अभियोग लगाउँदै उनीहरुमाथि कडा कारबाहीको मागगर्दै प्रहरीमा उजुरी दर्ता गरेका हुन् ।

तथ्यहिन आरोप लगाएर विभिन्न सामाजिक सञ्जाल प्रयोग गरी आफूहरुको चरित्र हत्या गरेको भन्दै उनीहरुलाई साइबर अपराधमा हदैसम्म कारबाही गर्न उजुरीमा माग गरिएको प्रहरी स्रोतले जानकारी दिएको छ ।

उजुरीकर्ताहरुले राजीखुसीमा गाडीमा चढेर सांसद यादव महोत्तरीबाट काठमाडौं आएको भएपनि काठमाडौं आएर आफूहरुको चरित्र हत्या गर्ने ढंगले अर्नगल प्रचार तथा मिडियाबाजी गरिएको दाबी गरेका छन् । यसअघि आजै प्रहरीमा खनाल, श्रेष्ठ र बस्नेत विरुद्ध अपहरणको अभियोगमा मुद्दा दर्ता भएको छ ।

उनीहरुले आफूहरुलाई जर्वजस्ती अपहरण गरी काठमाडौं ल्याएको भन्दै सांसद सुरेश यादवले आज काठमाडौं प्रहरीमा उजुरी दर्ता गराएका हुन् । यसअघि यही समूहले काठमाडौंस्थित जिल्ला सरकारी वकिलको कार्यालयमा पनि अपहरणको मुद्दा दर्ता गराईसकेको छ ।

Comment from facebook