झण्डै साढे ६ सय नेपाली अमेरिकाबाट नेपाल फर्कन तयार, उद्दारका लागि सरकारसँग एनआरएनएको आग्रह

Best Khabar Team | २०७७ जेठ २३ गते शुक्रबार

०६ मे, २०२०
न्यूर्योक । अमेरिकाका विभिन्न स्थानमा रहेका करिब साढे ६ सय नेपालीले तत्काल घर फर्कनका लागि इच्छा देखाउँदै उद्दारको लागि सरकारसँग आग्रह गरेका छन् । गैर आवासीय नेपाली संघ अमेरिकाका अनुसार विभिन्न काम विशेषले अमेरिका बस्दै आएका कामकाजी नेपाली, पढ्नका लागि आएका नेपाली तथा भ्रमणका लागि अमेरिका आएर लकडाउनका कारण अमेरिकामा रोकिएका नेपाली नागरिकले नेपाल फर्कने इच्छा देखाएका हुन् ।

हालै गैरआवासीय नेपाली संघ (एनआरएन) अमेरिकाले नेपाल फर्कन चाहने नेपालीहरुका लागि अनलाईमार्फत् फारम भर्नका लागि अनुरोध गरेकोमा हालसम्म ६ सय ४१ जनाले फर्म भरिसकेका छन् । मे २ तारिखसम्मका लागि फर्म भर्नका लागि अनुरोध गरिएको भएपनि अझै अझै केही नेपाली थप हुनसक्ने बताइएको छ ।

गैर आवासीय नेपाली संघ अमेरिकाका महासचिव पशुपति पाण्डेले जारी गरेको विज्ञप्तिमा अहिलेको विषम परिस्थितिमा धेरै नेपालीहरु नेपाल र्फकन चाहेकोले त्यसका लागि सहजीकरणको व्यवस्था गरिदिन अमेरिकास्थित नेपाली राजदूतमार्फत् सरकारलाई अनुरोध गरेका छन् ।

अमेरिकामा यो समाचार तयार पार्दासम्म ७२ हजार ८ सय ६७ जनाले कोरोनाका कारण ज्यान गुमाईसकेका छन् भने १२ लाख ४४ हजार ३ सय २ जना संक्रमित बनेका छन् । हालसम्म कति नेपालीलाई कोरोना लागेको छ भन्ने एकिन तथ्यांक नभएपनि कोरोनाको जोखिम उच्च रहेको भन्दै उनीहरु नेपाल फर्कने तयारीमा रहेका बुझिएको छ ।