युरोपेली मुलुक साइप्रसमा नेपालीले गरे नेपालीको हत्या ((प्रत्यक्षदर्शीको बयानसहित)

Best Khabar Team | २०७७ बैशाख २४ गते बुधबार

०६, मे, २०२०
लिंकरोभर, बेल्जियम । युरोपेली मुलुक साइप्रसमा सामान्य विवादमा एक नेपालीले अर्का नेपालीको छुरा प्रहार गरी हत्या गरेका छन् । साइप्रसको निकोसिया भन्ने ठाउँमा एउटै कोठामा बस्दै आएका सिन्धुपाल्चोकका एक युवकले चितवनका अर्का युवकलाई छुरा प्रहार गरी हत्या गरेका हुन् । हत्या गरेपछि हत्याराले प्रहरी चौकीमा पुगेर आत्मसमर्पण गरेका छन् । साइप्रसको निकोसियाको इभ्रिचिउमा बस्दै आएका स्थायी घर चितवन भएका विवेक अमगाईको छुरा प्रहारबाट ज्यान गएको हो ।

उनलाई घटनास्थलबाट उद्दार गरेर अस्पताल लैजाँदै गर्दा बाटैमा निधन भएको बताइएको छ । घटनामा गिरी थरका एक युवक सहभागी भएको भनिएपनि उनको वास्तविक नाम खुल्न सकेको छैन । उनले प्रहरी कार्यालयमा गएर आत्मसमर्पण गरिसकेका छन् । उनीहरु गएराति आफ्नै कोठामा रक्सी खाएर सामान्य विवादमा उत्रिएका थिए ।

**घटनास्थलमा घाइते अचेत अवस्थामा भेटिएको अमगाईको तस्वीर ।**

घरायसी अर्थात् कोठासफा गर्ने विषयमा भएको विवादले झडपको रुप लिँदा गिरीले अमगाईमाथि छुरा हानेको घटनास्थलमा पुगेका नेपालीहरुले बताएका छन् । घटना भएको घरमा १० जना नेपालीहरु बस्दै आएका छन् । मृतक अमगाई २१ वर्षका रहेका छन् भने गिरी २२ वर्षका रहेका छन् । उनीहरु दुबै करिब २ वर्ष अघि विद्यार्थी भिषामा साइप्रस आएका थिए ।

**घटनास्थल साइप्रसको इभ्रिचिउ गाउँ र इन्सेटमा मृतक अमगाईको तस्वीर ।**

३ वर्षअघि युरोपेली मुलुक पोर्चुगलमा धादिङ्गका एक युवकले कामको विषयमा विवाद हुँदा पर्वतका अर्का युवकलाई चक्कु प्रहार गरी हत्या गरेका थिए । हत्याका आरोपी हाल पोर्चुगलको जेलमा रहेका छन् । भिडियो हेर्न तलको लिंकमा क्लिक गर्नुहोला ।