भर्ना र अनलाईन कक्षाको नाममा विद्यार्थीसँग शुल्क नलिन विद्यालयहरुलाई सरकारको निर्देशन

Best Khabar Team | २०७७ बैशाख २२ गते सोमबार

०४, मे, २०२०
काठमाडौं । विश्वव्यापी रुपमा फैलिएको कोरोनाको संक्रमणका कारण नेपालमा पनि करिब डेढ महिनादेखि लकडाउन जारी छ । लकडाउनका कारण चैत्र देखि अहिलेसम्म विद्यालय तथा क्याम्पसहरु बन्द छन् । यही बीचमा केही निजी विद्यालय सञ्चालकहरुले लकडाउनको बेवास्था गरी आर्थिक संकलन गर्ने उद्देश्यले अनलाईनको कक्षा सञ्चालन गर्ने नाममा अभिभावकसँग रकम उठाउने चेष्टा गरिरहेका छन् ।

यस्तै कतिपय निजी विद्यालयहरुले विद्यार्थीलाई अनलाईनबाट भर्ना हुनसक्ने गरी अनलाईन फर्म समेत सार्वजनिक गरिरहेको सन्दर्भमा सरकारले उनीहरुलाई तत्काल यस्ता कार्य रोक्न निर्देशन दिएको छ । शिक्षा मन्त्रालयले आज साँझ एक विज्ञप्ति निकालेर अर्को सूचना जारी नभएसम्म र कोरोनाको सन्त्रास कायम रहेसम्म तत्काल अनलाईन कक्षा तथा विद्यार्थी भर्नाको नाममा विद्यार्थी तथा अभिभावकसँग कुनैपनि शुल्क नलिन विद्यालय प्रशासनलाई निर्देशन दिएको हो ।

सरकारको यो निर्णयसँगै अब कुनैपनि विद्यालयहरुले कुनै पनि कक्षा, तह र अनलाइन कक्षाका नाममा शुल्क लिन नपाउने भएका छन् । यस्तै भर्नाको नाममा पनि तत्काल शुल्क लिने उनीहरुको प्रपञ्च तुहिएको छ । शिक्षा, विज्ञान तथा प्रविधि मन्त्रालयको मन्त्री स्तरीय निर्णय भन्दै सरकारले आज साँझ जारी गरेको विज्ञप्तिमा कुनै पनि कक्षा वा तहमा नयाँ भर्ना लिन र अनलाइन पठनपाठनका नाममा शुल्क नलिन निर्देशन दिइएको छ ।

सहसचिव दीपक सुवेदीको नाममा जारी भएको विज्ञप्तिमा माध्यमिक शिक्षा परीक्षा, कक्षा ११ तथा १२ का परीक्षा हालका लागि स्थगित गरिएको उल्लेख छ ।